Sâlifü'z-zikr Bilâslı Mehmed Paşa Maçin vakʿasında sebât ü istikrar sebebi ile zahmdâr ve giriftâr-ı kayd-ı isâr olup, baʿde'l-musâlaha Tırhala Sancağı'yla tenşît u tefrîh [Ü1 277b] ve bin nefer piyâde ile Belgrad muhâfazasına ʿazîmeti me'mûriyyeti emrinde tasrîh olunup, müretteb olan Bosna askeri zuhûr edinceye dek o mikdâr asker ile hıdmet-i muhâfazada kıyâm ve me'mûriyyeti hitâmında mansıbına tahrîk-i zimâm etmişidi. Bundan sonra me'mûr olduğu mahallerde ve bâ-husûs Sofya ve Lom cenglerinde zuhûra gelen şecâʿati, "Ke'ş-şemsi fî râbiʿati'n-nehâr" bedîdâr olup, bu makūle uğur-ı devletde cân-sipâr olanları mazhar-ı eltâf ve matlablarına îsâl ile nümûne-nümây-ı ahlâf etmek şîme-i Devlet-i ʿaliyye'den ise dahi, “Küllü emrin bi-vaktihî merhûn” mefhûmu üzere bu âna dek dûşîze-i matlabı, verây-ı sitâre-i gaybdan rû-nümûn olmamışidi. Bu esnâda dağlı eşkıyâsına müstakıllen me'mûr ve sâbıkda güzerân olan hidmeti mezkûr olup, emeğine riʿâyet ve nüfûz u iʿtibârına kuvvet irâdesiyle işbu Zilhicce'nin on altıncı günü mûmâ ileyhe ihsân-ı Rütbe-i Vezâret [Ü3 76a] olundu.