Erzurum Vâlîsi olan Vezîr es-Seyyid Ahmed Paşa bundan akdem hatfe enfihî vefât ve ʿazm-i semt-i ʿArasât edüp, esbâb-ı Vezâret'i müteferrik ve dâyiresi halkı perîşân olmamak irâdesiyle, Vezâret'e min-külli'l-vücûh liyâkat ü istihkākı nümâyân olan mahdûm-ı necâbet-lüzûmu Mîr-i mîrân-ı kirâmdan es-Seyyid ʿAlâʾeddîn Paşa'ya bi'l-istîzân Eyâlet-i Erzurum inzımâmı ile gāyet-i merâtib-i beşeriyye ve kusvây-ı âmâl-i insâniyye olan Rütbe-i vâlâ-yı Vezâret ʿinâyet ü ihsân olunmuş idi. Ancak Eyâlet-i Erzurum bi-hasebi'l-vakti ve'l-lüzûm hâlâ Trabzon Vâlîsi Vezîr Battâl el-Hâc Hüseyin Paşa'ya ıtbâk-ı uli'n-nühâ ve ittifâk-ı ashâb-ı ârâ ile izâfe vü ilhâk olunup, bu takdîrde müşârun ileyh bilâ-mansıb kalmağla, matlaʿ-ı [Ü1 275a] Vezâret'inde beyne'l-ehâlî kadr ü menzileti ʿâlî olmuşiken, mansıbdan hâlî kalması, revâ-dâşte-i [Ü3 73a] tabʿ-ı şefekat-i nebʿ-i hazret-i Şehriyârî olmadığına binâ'en, Ordu-yi hümâyûn'dan hâl ü şânına çespân bir mansıb tevcîh olunması bâbında irâde-i menâyih-ifâde-i hazret-i Cihân-bânî teʿalluk u cereyân ve Sadrıaʿzam ve Serdâr-ı ekrem hazretleri tarafına bu keyfiyyet ifâde vü beyân olundu.