Berren ve bahran Mısır'a cedîd asker tertîbi lâzım gelüp, Trabzon Vâlîsi Vezîr Hüseyin Paşa ile mukaddemâ istimzâc olunup, Erzurum Eyâleti kendüye ilhâk olunduğu sûretde yirmi bin kadar piyâde ihrâc eyleyeceğini teʿahhüd etmiş bulunmağla, Canik ve Trabzon ve Gümüşhane ve Erzurum ve sâyir o tarafda vâkiʿ kazâlardan on beş bin piyâde asker cemʿ u tahrîr ile bi'n-nefs müşârun ileyhin Mısır'a teveccühü karâr-gîr-i [Ü1 274b] erbâb-ı tedbîr olup, işbu Zilhicce'nin dokuzuncu günü Erzurum Eyâleti dahi tarafına tevcîh ve maʿiyyetinde ihtişâd eyleyecek asker ru'esâsına ve hükkâm-ı memâlike başka başka evâmir-i şerîfe ısdâr ve nakilleriyçün refte refte sefâyin istîcâr [Ü3 72b] olunup, asker ictimâʿından sonra müşârun ileyh Âsitâne-i saʿâdet'e vürûd ile savb-ı maksûda ʿazîmet etmek tedâbîri kuvvetden fiʿle îsâl ve münferiden orduya me'mûr olan baʿzı kazâ askerinin dahi me'mûriyyet-i sâbıkaları ibtâl ve maʿiyyet-i müşârun ileyhe ibdâl olunup, zikr olunan asâkirin mesârıfına ehâlî-yi memleket mütehammil olmayup, bir mikdârı mîrîden ve bir mikdârı kazâlardan ru'yet olunmak, hâsılı bu mâddeye dâ'ir olan keyfiyyâtın cümlesi süpürde-i ʿuhde-i hamiyyeti kılınup, bâlâsı hatt-ı hümâyûn ile müveşşah emr-i celîlü'l-mikdâr savb-ı müşârun ileyhe tesyâr olundu.