Mehbıt-ı Cibrîl-i Emîn ve dâr-ı hicret-i Mahbûb-ı Rabbü'l-ʿâlemîn olan Medîne-i münevvere ʿalâ-sâkinihâ efdalü't-tahiyyede Medîne Târîhi müʾellifi olan İmâm Semhûdî kavline nazaran altmış ve ʿalâ-rivâyetin yetmiş kadar ʿayn-i cârî mevcûd olup, murûr-ı ezmân ve inkılâb-ı devrân ile turuk ve kanavâtına bakılmayup, ekserîsi gāyir ve giderek o Belde-i Tayyibe'de âsâr-ı cedb ü galâ zâhir olup, bu esnâda meşâyîh-ı ʿUrbân hafr ve tathîr-i sübül-i miyâha dâmen-çîn-i gayret ve dört mahalde su bulup, icrâsına hasr-ı sâʿid-i himmet eyledikleri ve bundan sonra cûşiş-i feyyâza-i lutf-i Hakk ile yevmen-fe-yevmen ʿuyûn-ı gāyire-i sâyire dahi bulunup, etrâf-ı Medîne-i münevvere hadâyık-ı zâtü'l-behce ile nezâret-bahş kılınup, cihâniyân ve vücûdün-mâ ile ehâlîsi hars ü zerʿa iştigāl edüp, min-külli'l-vücûh o bukʿa-i mübârekede hısb u rehâ nümâyân olacağını Medîne-i münevvere Muhâfızı Sadr-ı esbak Vezîr Yûsuf [Ü3 68b] Paşa hazretleri ifâde vü beyân edüp, bu keyfiyyet inşâ'allah mukaddime-i feyz ü bereket ve zâyirîn ü mücâvirîne sebeb-i hısb u refâhiyyet olacağı eclâ-yı bedîhiyyâtdandır.