Bâlâda beyân olunduğu vech üzere Mısr-ı Kāhire'de olan Françe tâ'ifesi ta'yîn-i müddet ile mütârekeyi tesviye vü tanzîm ve baʿde't-tahliye Devlet-i ʿaliyye sefâyini ile vilâyetlerine ʿazîmeti bi-hasebi'z-zâhir eğerçi tasmîm eylediler. Ancak "Leyse'l-ʿadüvvu ʿalâ hâlin bi-me'mûn" mefhûmu üzere aʿdâdan emniyyet me'mûl-i erbâb-ı intibâh u basîret olmayup, husûsan Fransızlar'ın ʿahd ü peymânı nakş-ber-âb ve vazʿ u hareketleri hem-nakş-ı serâb olduğundan gayri, kutr-ı Mısır'ın agyârdan istısfâsı ve irâde-i Devlet-i ebed-müddet üzere verilecek nizâmının bekāsı beher hâl asker-i cedîd istihsâline mevkūf olduğu Sadrıaʿzam ve Sipâh-sâlâr-ı ekrem tarafından maʿrûz-ı ʿatebe-i gerdûn-mertebe-i hazret-i Tâcdârî kılınmağla, Anadolu'nun baʿzı mahallerinden Çapân-oğlu ve sâyir müteʿayyinân-ı memleket maʿrifetleriyle on bin mikdârı süvârî ve yirmi bin mikdârı piyâde tertîb ü tahrîr ve münâsib başbûğlar ile maʿiyyet-i Serdâr-ı ekremî'ye serîʿan iltihâkları bâbında evâmir-i ʿaliyye ile mübâşirler tesyîr olunduğundan gayri, ʿArabistân ve Rakka ve Sivas ve Maʿden etrâfından ihrâc olunacak askerin tertîbi dahi baʿde'l-istimzâc Ordu-yi hümâyûn'a havâle ile süvârî [Ü3 68a] ve piyâdeden muʿasker-i Pâdişâhî, fazl-ı İlâhî ile beriyyü'l-ihtiyâc kılındı, “Lâ tetruki'l-hazme fî şey'in tübâşirihû, fe-in selimte fe-mâ fi'l-hazmi min be's"