Arpa Emîni olan Mükellef-zâde Mustafa Bey habs-i serîret ve fesâd-ı tabîʿat iktizâsıyla, istiklâl-i Sadr-ı vâlâ-kadr'ı ihlâl eder erâcîf ü ebâtîl intişârına ictisâr edüp, Âsitâne-i saʿâdet'den hüsn-i müdâfaʿa ile tebâʿüdü lâzime-i vakt ü hâlden olduğuna binâ'en, maʿnen tağrîb ve hâricde baʿzı vesâyâ teblîği zımnında Kapu Kethudâsı olduğu Vezîr Cezzâr Paşa tarafına me'mûriyyeti tasvîb olunmuşidi. Mûmâ ileyh tekālîb-i rûzgârdan gâfil ve bu me'mûriyyetin hâtimesi baʿzı ağrâzına fâtiha-i ikbâl olacağını mütehayyil olarak tayy-i merâhil ve kat‘-ı menâzil ile 'Akkâ'ya vâsıl olup, tebeʿât-ı sabıkasını tezekkür ve giderek “Men yezra‘i'ş-şevke lem-yahsıd bihi'l-‘inebâ” meʼâlini tefekkür ile seylâb-ı ‘illet-i insıbâb, hâne-i 'ömrünü [Ü3 53a] harâb ve kelime-i şerr makāmını zîr-i türâb eylediği haberi, vârid-i Dergâh-ı muʻallâ-kıbâb olup, bakıyye-i müddet-i mansıbı Îrâd-ı Cedîd tarafından idare olunmak fermân ve muhallefâtı düyûnuna ve fazlası yetîmine ihsân olundu. Mûmâ ileyh mütehettik ü cesûr ve hubb-i dünyâ ile memkûr olup, celb-i mâl ve kesb-i ikbâl ümniyyesiyle ‘azâyim-i umûra tesaddî ve min-külli'l-vücûh dâ'ire-i hadd ü edebi tecavüz ü teʿaddî eylediğinden gayri, sû'-i sanî ve fi‘l-i beşîʿa-i mücâzât muktezây-ı tabîʿat-i vakt [Ü1 257b] olduğunu 'adem-i mülâhaza ile lisânını mâ-lâ-ya'nîden keff ü muhafaza eylemeyüp, ‘âkıbetü'l-emr bu kişt-zâr-ı mekāsıd u emânı olan zemân-ı fânîden iltikāt-ı hubûb-ı kâm-rânî edemeyüp, mahrûm u nâ-kâm ve sûy-i âhırete şedd-i hırâm eyledi.