Fî'l-asl ‘Ayntâb sâkinlerinden olup, belde-i mezkûrede Mahkeme Kâtibi ve baʿdehû Mîr-i mîrân'dan Sivas'da katl olunan Nûrî Paşa'ya Dîvân Kâtibi olan es-Seyyid 'Asım Efendi kenâr memleketlerde nakd-i hüneri nâ-sere ve nahîl-i ümmîdi gayr-i müsmire olduğunu ‘arz-ı kuvve-i mütefekkire edüp, mir'ât-ı zeng-beste-i ma'rifete saykalda safvet olan Âsitâne-i saʿâdet'e tevcîh-i veche-i ‘azîmet ve bir medresede ikāmet ile kûşe-nişîn-i vahdet olmuşidi. Tabâyi'-i nâsda ‘araz-ı gayr-i müfârık olan kusûr-ı himem muktezâsınca ne mahalle vardıysa, zahmına merhem bulamayup, bilâhare Sadr-ı Rûm-i esbak merhûm ‘Abdullah Monla Efendi'ye merkūmun müfredât-ı ahvâli icmâl ve dâ'irelerine celb olunmak ruhsatı istihsâl olunup, memnûn u şâd-kâm dâ'ire-i müşârun ileyhde istikrâr u ârâm [Ü3 53b] ve bir müddetden sonra himmet-i mahdûm ile münharıt-1 silkü'l-le'âl-i müderrisîn-i kirâm olduğundan başka, kadri gayr-i zâyiʿ ve hüner ü maʿrifeti müstefîz ü şâyiʿ olmak içün Kāmûsu'l-'Acem olan Bürhân-ı Kātıʿ'ın tercemesine iğrâ ve iki sene zarfında terceme-i mezkûre resîde-i hayyiz-i intihâ oldukda, baʿzı hüner-perver terbiyesiyle huzûr-ı Şehriyâr-ı kadr-şinâs'a 'arz u teblîğ ve hakkında kelimü't-tayyib-i hüsn-i taʿrîf bî-dirîğ kılınup, tercemesi iʿtibâra sezâ ve beş bin guruş ʿatıyye ve şehriyye yarım kîse maʿîşetle mazhar-ı lutf-ı Hudâvend-i yemm-i ʿatâ olduğundan fazla, rütbesi terfîʿ ü iʿlâ olunmuşidi. Terceme-i mezkûrenin beyne'n-nâs nüshası kesîr ve nefʿ-i vefîr olmak içün [Ü1 258a] Dâru't-tıbâʿ-ı ʿâmire'de tabʿ ü temsîli murâd-ı hümâyûn olup, fi'l-hâl emre imtisâl ve beş yüz nüsha tabʿ u istihsâl olunup, işbu Cumâdelâhıre'de nüshaları münteşir ve ʿan-asl iki-üç yüz guruş ile bir nüshasının tahsîli müteʿassir olan kitâb el-yevm otuz guruş ile müteyessir olup, zemân-ı saʿd-iktirân-ı hazret-i Şehriyârî'de bu eser-i cemîlin bürûzu ʿulüvv-i himmet-i Şâhâne'ye bürhân ve sâye-i hemâ-vâye-i Husrevâne'de müstezıll olan ʿibâd-ı zaʿîfü'l-iyâda teshîl-i mesâlih sûretinde bir nevʿ ihsân olduğu bî-reyb ü gümândır.