Birkaç mâhdan berü Bahr-i sefîd Boğazı'nda Donanma-yi hümâyûn ile ikāmet ve münteşir olan merâkib-i Sultâniyye'ye nezâret üzere olan Kapudân-ı deryâ Vezîr Hüseyin Paşa hazretlerinin Âsitâne-i saʿâdet'e ʿavdetleri irâde olunup, Korfa tarafında olan donanma dahi muʿâvede üzere olmağla, cümlesi ictimâʿ ve Âsitâne tarafına feth-i şirâʿ etmişler idi. Birkaç mîl katından sonra “Tecri'r-riyâhu bi-mâ lâ-teştehi's-süfün” mefhûmu üzere nâ-gâh bâd-ı muhâlif hübûb ve Nakra Burunu'nda [Naʿra Burnu] bir firkateyn kaʿr-ı deryâya rüsûb edüp, fi'l-hâl sanʿat-ı cerr-i eskāl ile ahmâli [Ü1 255b] tahfîf ü tenkīs ve fazl-ı Hakk ile bir mahalline şiken-i zarar ʿârız olmaksızın tahlîs olunup, kemâ-kân Âsitâne tarafına imâle-i sükkân-ı ʿavd ü kufûl ve işbu Recebü'l-ferdin yirmi birinci günü mersây-ı Tersâne'ye lenger-endâz-ı vusûl [Ü3 51a] oldular.