Yedi mâha karîb Sadâret-i ʿuzmâ Kāyim-makāmlığı'nda kâr-fermâ olan Sâmî Ebûbekir Paşa'nın ru'yet-i umûrda batâ'et ü rehâveti mezkûr ve eyyâm-ı hâliyye vü fârigada iştigāli sâyiğ ve hengâm-ı esfârda hadd-i mahzûra bâliğ olan ahvâl ile beyne'l-hâssi ve'l-ʿâmm meşhûr olduğundan başka, mizâc-ı feyz-imtizâc-ı Mülûkâne'ye muvâfık hıdemâta gayr-i muvaffak ve vâkiʿ ve gayr-i vâkiʿ baʿzı esbâb ile harekâtından müşme'iz bulunan Serdâr-ı ekrem hazretlerinin dahi müşârun ileyhden inhirâfı sebeb-i evvele mülhak olduğuna binâ'en, işbu şehr-i Receb'in onuncu Ahad günü o makām-ı refîʿden mehcûr ve şimdilik Bahr-i sefîd muhâfazasına me'mûr olmuşidi. Bir ân akdem esnâf ile dâd ü sitedini ru'yet ve ashâb-ı hukūku ırzâ ile muzga-i efvâh-ı enâm olmakdan zâtını sıyânet lâzım iken, Rikâb-ı kâmyâb'dan kesb eylediği müfârakat u mehcûru ârâm-rübây-ı ıstıbâr u şuʿûru olup, ʿazlinden sonra birkaç gün Âsitâne'de mukīm olduğu hâlde bu mahzûrun defʿini ʿadem-i tasavvur, esnâf makūlesine [Ü1 255a] sebeb-i ikdâm ü tecâsür olup, bi-ecmaʿihim Cuma günü Rikâb-ı müstetâb'a bess-i şekvâ ve matlûblarının tahsîlini niyâz ü istidʿâ etmeleriyle, fi'l-hâl mir'ât-ı temâsîl-i hakāyık-ı eşyâ olan tabʿ-ı hazret-i Şehriyârî'de gubâr-ı infiʿâl hüveydâ olup, emvâlinden hukūk-ı nâs istîfâ ve kendüsi merfûʿu'l-Vezâre Tekfûrdağı'nda ikāmet etmek irâde-i ʿaliyyesi hakkında rû-nümâ oldu. Sâbıkā Çavuş-başı olan ʿÖmer Paşa-zâde ʿAbdullah Bey [Ü3 50b] -efendi'nin nâsıye-i hâlinde âsâr-ı rüşd ü reviyyet nümâyân ve şimdiye dek müstahdem olduğu ʿazâyim-i umûr-ı Devlet-i ʿaliyye'de sıdk u istikāmeti müstagnün ʿani'l-beyân olup, teyakkuz u temekkün sebebleriyle akrânına râcih ü fâyik ve Rütbe-i Vezâret'e min-külli'l-vücûh sezâvâr u lâyık olduğuna binâ'en, Bekir Paşa'nın ʿazli günü bağteten Serây-ı hümâyûn'a daʿvet ve hilʿat-i serâser-i behcet-i Vezâret ve Kāyim-makāmî ile dûş-ı istihkākı pür-zîb ü zînet kılınup, selefinin mutasarrıf olduğu Anadolu Eyâleti'yle dahi mükerrem, ve kâlây-ı vâlâ-yı ʿizz ü ihtişâmı tamga-yı bî-hemtây-ı mekârim-i Pâdişâhâne ile muʿlem kılındı.