Devlet-i ʿaliyye'de Re'îsülküttâb olup, iki yüz on bir senesi Safer'inin on dördüncü günü ʿazl ü tenkîb ve birkaç günden sonra Rodos Cezîresi'ne nefy ü tagrîb olunan Râtıb Ebûbekir Efendi işbu bin iki yüz on dört senesi Cumâdelûlâ'sında mahnûkan vefât ve terk-i vedîʿa-i hayât eyledi. Mûmâ ileyh hutûb-ı cesîmede müstahdem olup, gavâmız-ı umûr ile meşgûl olanlara medâr-ı ʿibret olmak içün mevzûʿ-ı fenn-i târîh üzere esbâb-ı fikdânı havâss-ı nâsdan bi't-teharrî su'âl ü istikrâ olundukda, baʿzıları, Devlet-i ʿaliyye'yi Françelü ittifâkına imâle vü tergîb edüp, tâ'ife-i mesfûrenin dimâğlarında müstekarr olan mukaddime-i fesâd netîce-bahş-ı murâd olmayacağını istidlâl ile erbâb-ı ʿukūl mümâşâtdan iʿrâz ve o hilâlde Mısır havâdisi dahi intişâr u intihâz eylediğinden, ʿazl ü tagrîbi karâr-gîr-i erbâb-ı menʿ ü iʿtirâz olduğun ve baʿzıları, zimâm-ı devleti kabza-i tasarrufuna almak içün defʿ-i mezâhim sevdâsına düşüp, eclâf-ı nâsa taʿyîn-i merâtib ve tevcîh-i menâsıb tasavvuruyla Şehriyâr-ı sütûde-âsâr'ı her bâr taglîte çalışup, bu tasavvur-ı zâhirü'l-butlân giderek âteş-i gayz-ı Mülûkâne'yi fürûzân edüp, ʿâkıbet iʿdâmını mûcib olduğun [Ü3 47b] ve baʿzıları Âsitâne'de tahrîr olunan dalkılıclar, Ebuhûr vakʿası zuhûru hilâlinde Rodos'a varup, Donanma Başbûğu [Ü1 252b] olan ʿAbdülfettah Bey'in Ebuhûr muhâriblerine imdâd eylemediğin hâliyyü'z-zihn ʿaskere bi'n-nefs iʿlân ve Seydî ʿAlî'nin Başbûğluğu'nu istihsân ve bu gayz u kîn ile dalkılıclar, Leymeson İskelesi'ne vardıklarında, Kapudân-ı merkūmu ʿâlem-i hestîden pinhân eylediklerine ʿillet ve o vakʿanın hudûsuna âlet olduğun ve baʿzıları Ordu-yı hümâyûn'dan ıtlâkına kasd olunduğun hiss ü teyakkun ile yüz bulup, rızây-ı devlete muhâlif Françelü'ye müteʿallık baʿzı ahvâl tahrîr eylediğini rivâyet etmeleriyle, ʿalâ-külli mine't-tekādîr ʿafvi mümkin olmayacak bir cünha-ı ʿazîmede bulunduğundan ve ser-nüvişti bu yüzden olduğundan, hükm-i kazâ hakkında cârî ve cesedi tahte'l-arz mütevârî oldu.