İngiltere Kıralı tarafından tasdik-nâme ile vürûd eden Büyük Elçi birkaç gün mukaddem Bâb-ı âlî'ye gelüp, huzûr-ı Kāyim-makāmî'de tasdik-nâmeler mübâdele ve elçiye serâser kaplu semmûr kürk ilbâs olunup, maʿiyyetinde olan Sır Kâtibi'ne ve sâyirlere dahi kürkler ve hilʿatler ilbâsıyla, izhâr-ı hüsn-i muʿâmele ʿakabinde ittifâk mâddesinde Devlet-i ʿaliyye tarafından murahhasan mükâlemeye me'mûr, eşref ü aʿlem-i sudûr olan İbrâhîm ʿİsmet Beyefendi'ye ve Re'îsülküttâb Efendi'ye birer bol yenlü ve Mükâleme Kâtibi Âmedî Efendi'ye kubûr yenli semmûr kürkler iksâ olunmuşidi. İşbu Cumâdelâhıre'nin yirmi sekizinci Salı günü tertîb olunan Dîvân-ı muʿallâ-erkân'da elçi-yi mesfûr, Kıral'ı tarafından getürdiği hediyyeyi takdîm ve nâmeyi teslîm [Ü1 252a] edüp, kemâ-kân kürkler ve hilʿatler ile tefrîc ve geldikleri mahalle tesrîh ve ferdâsı Devlet-i ʿaliyye murahhasları mazhar-ı nevâziş [Ü3 47a] ve iltifât-ı hazret-i Tâc-dârî olup, ʿİsmet Beyefendi'ye ve Re'îsülküttâb Efendi'ye birer mücevher kutu ihsân ve ser-i mübâhâtları müvâzî-yi fark-ı Ferkadân kılındı.