Mûmâ ileyh, sâhib-i Dîvân Yahyâ Efendi hafîdi Debbâğ-zâde sulbünden zuhûr ve yetmiş dokuz sâlinde zümre-i müderrisîne iltihâk ve baʿzı niyâbetler ile imrâr-ı eyyâm ü şühûr edüp, iki yüz sekiz Muharrem'inde Kuds-i şerîf Mevleviyyeti ile mesrûr ve iki yüz on üç senesinde Ordu Kadısı nasb olunup, Cezzâr Paşa tarafına me'mûr olmuşidi. ʿAkkâ'da vâkiʿ fütûhâtda Mekke-i mükerreme Pâyesi'yle hurrem ve on dört senesi Cumâdelûlâ'sında Şâm'a vazʿ-ı kadem ve ru’yet-i Sadrıaʿzam ile mükerrem olup, birkaç günden sonra “Cüneyn” nâm mahalde cürʿa-keş-i [Ü3 45b] câm-ı memât ve sicill-i ʿömrü tayy-kerde-i dest-i Hâdimü'l-lezzât oldu. Mûmâ ileyh zâyirçe ve takvîm istihrâcında ʿameli, fenne mutâbık ve halbetü'r-rihân-ı münâzarada âhar musallî ise, kendüsi sâbık idi. Evlâd u ahfâdı her ʿasırda mütehayyiz bulunan Hasancân'a ittisâl ü iltihâkı bu vechiledir ki, zikr ü işâret olunur: Hasancân – Hâce Sa'deddîn, el-Müftî – Mehmed Esʿad, el-Müftî – Mehmed Ebû Saʿîd, el-Müftî – Feyzullah, el-Müftî – Mehmed Reşîd, el-Müderris ʿAbdullah, Kādî-yi Burusa – Ahmed, Kādî-yi Medîne-i münevvere – Sâhib-i terceme Mehmed Reşîd.