Mora Muhassılı Vezîr Ahmed Paşa zulmünden Mora halkı ser-cünbân-ı dâd u efgān ve nizâm-ı beldeye muhill evzâʿa mübâşeret eylediği zebân-âver-i zikr ü beyân kılınup, İnebahtı Muhâfızı olan Vezîr Mustafa Paşa, müşârun ileyhden ehven ve Mora Eyâleti tarafına tevcîh olunmak müstahsen olduğuna binâ'en, [Ü1 251a] işbu evâhır-ı Cumâdelâhire'de Mora, müşârun ileyhe ve münhall olan İnebahtı, selefine tevcîh olunup, bu âna dek Bender muhâfazasına dahi bir Vezîr tahsîs olunmayup, şimdiye dek eğerçi Rumeli Vâlîsi'nin ʿuhdesinde kalmışidi. Ancak Bender muhâfazası müstakıllen bir Vezîr'e muhtâc ve mekân-ı baʿîdde olan Vezîr'e sipârişi umûr-ı serhadde mûcib-i ihtilâl ü ihtilâc olduğuna binâ'en, Yenişehir'de mütemekkin Sadr-ı esbak Hasan Paşa'nın kayd-ı ikāmeti terkîn ve Bender Muhâfazası'na sevk u taʿyîn olundu.