Bundan akdem ʿAkkâ Kalʿası'nda mahsûr ve hezîmet-i aʿdâdan sonra Mekke Pâyesi'yle manzûr olan Ordu-yi hümâyûn Kadısı Debbâğ-zâde Mehmed Reşîd Efendi, Ordu-yi hümâyûn'a celb olunup, hıdmet-i lâzimesinde kıyâm ve vukūʿ bulan daʿvâları fasl ile icrây-ı ahkâm eyler iken, nâ-gâh kevkeb-i ʿömrüne sukūt ve necm-i hayâtına hübût ʿârız olup, köhne-takvîm-i cihândan keff-i nazar ve mütâlaʿa-i zâyirçe-i ʿâlem-i fânîden guzz-ı basar eylediği, Sadr-ı bedr-i kadr tarafından inhâ ve sâbikā Mısır Kadısı olup, bir takrîb dest-i düşmenden rehâ bulan Başmakcı-zâde İbrâhîm Edhem Efendi, Mevkib-i hümâyûn'da mevcûd [Ü1 250b] olmak hasebiyle Ordu Kadılığı mûmâ ileyhe istidʿâ olunmağla, fi'l-hâl işâret-i hazret-i Fetvâ-penâhî'yle emr-i celîlü'ş-şânı terkîm ve Sadrıaʿzam ve Serdâr-ı ekrem tarafına baʿs ü takdîm olundu.