Bundan akdem Âsitâne-i saʿâdet'de tahrîr ve Bahr-i sefîd cânibine sevk u tesyîr olunan tavâyif-i asâkir, Rodos İskelesi'nde [Ü3 44b] ictimâʿ u tehaşşüd ve işbu Cumâdelûlâ gurresinde Rodos'dan hareket ile Kıbrıs Cezîresi muzâfâtından Leymeson İskelesi'ne tevârüd edüp, iki günden sonra Riyâle Kapudanı ʿAbdülfettâh Bey dahi zikr olunan lîmâna vusûl bulup, Seydî ʿAli Bey'in kudûmuna intizâr ile bir hânede meks ü karâr etmişidi. Mukaddemâ Ebuhûr vakʿası reh-yâblarından üç yüz kadar asker-i ʿarbede-cû mahsûrlara ʿadem-i iʿânet ve halâs olanları sefâyine [Ü1 250a] almakdan mümânaʿat ʿilletlerini îrâd eyleyerek, “Abdülfettâh Kapudan üzerine gulüvv ve darb-ı tîğ u hançer ile kabây-ı hayâtını çâk ve mekânını zîr-i hâk eylediklerinden gayri, Muʿallem Asker Başbûğu İsmâʿîl Bey'i ve Nüzül Emîni Zaʿîm Mustafa Ağa'yı cerh-i cüz’î ile tekdîr ve fi'l-hâl zâbitân yetişüp, neferât-ı mezkûreyi menʿ u tahzîr eyleyüp, cümlesi ser-dâde-i tavk-ı inkıyâd ve husûmetleri Riyâle Kapudanı'na münhasır olduğunu îrâd ve Seydî Ali'nin Başbûğluğu ile her ne mahalle me'mûr olurlar ise itâʿat edeceklerin pîş-nihâd etmeleriyle, serân-ı asker ve zâbitân-ı leşker, İngiliz Amirali İsmit Ceneral ile meşveret eyleyüp, ihtiyâr-ı asker ile Seydî Ali, Başbûğ nasb ü taʿyîn ve nâr-ı fitne bu cihetle itfâ vü teskîn ve mâh-ı merkūmun on ikinci günü İngiliz donanması mürâfakatiyle, İskenderiyye ve Dimyât taraflarına teveccüh eyleyeceklerin Lefkoşe Nâ'ibi iʿlâmıyla ve zâbitân-ı asâkir ʿarz u mahzarlarıyla Dergâh-ı ʿadâlet-penâh'a ifâde vü tebyîn etmeleriyle, ber-muktezây-ı vakt ü hâl merkūmun [Ü3 45a] Başbûğluğu içün ısdâr-ı misâl-i lâzimü'l-imtisâl kılındı.