Korfa tarafında olan Donanma-yi hümâyûn ile Rûsiyye sefâyini, İtalya sevâhilini güzer ile Messina Adası mülhakātından Palermo sâhiline vaz‘-ı lenger eyledikde, Sicilyateyn Kıralı tarafından resm-i mihmân-nüvâzî icrâ ve zahîre ve sâyir ikrâm ile şerîta-i ittifâk îfâ olunup, o hılâlde Donanma-yi hümâyûn levendâtından ba'zı kimseler şehre çıkup, yedlerinde mevcûd olan nukūdu sarf u harc murâd eylediklerinde, nukūd-i mezkûrenin keyfiyyet ü kemmiyyeti ehâlînin mechûlü olup, iki tarafın su'âl ü cevâbı mu'ârazaya müncerr ve giderek miyânede muhârebe kârger olup, tarafeynden birkaç kimse nâ-bûd ve zâbitân tevassutuyla nâr-ı fitne fürû-nühüfte-i humûd olup, levendât gemilere râkib ve fi'l-hâl Korfa tarafına âyib ve yirmi mâh kadar donanma askeri istihdâm ile bî-tâb u tâkat ve 'avdete hâhiş-ker-i ruhsat olduklarını mübeyyin Kapudâne Ahmed Bey'in tahrîrâtı, Kapudan Paşa hazretleri tarafından Âsitâne-i râstâne resân oldukda, ‘avdetlerine ruhsat-ı hümâyûn erzânî ve ol bâbda ısdâr-ı emr-i Cihân-bânî [Ü3 44a] kılındı.