Ak-deniz'de vâkiʻ olan me'âkıl u husûnun ta'mîr ü termîmi ve ‘ale'l-husûs boğazda olan kal‘aların tarsîn ü tahkîmi mûcibât-ı vakt ü hâlden olduğuna binâ'en, bundan akdem Mühendis Güler Bey-zâde, sugr-i Bahr-i sefîd'e gönderilüp, keşf ü mu'âyeneden sonra kal'aların resmini Devlet-i ‘aliyye'ye takdîm edüp, resm-i mezkûr üzere emr-i binâ vü ta'mîre ihtimâm olunmak irâdesiyle hâcegândan Nâşid Efendi ve Mustafa Efendi ve bunlara nezâret içün sâbıkā Defterdâr Mektûbçusu ‘Abdünnâfî Efendi [Ü1 249a] muvakkaten Sipâh Kitâbeti tevcîhiyle me'mûr olup, me'âşları [Ü3 43b] tanzîm ve harc-ı râhları teslîm olunmuşidi. Mâdde-i vâhide zımnında te'addüd-i me'mûrîn ihtilâf-ı ârâyı îcâb ile maslahatı ifsâd ü tevhîn eyleyeceği, hâtır-ı eşref-i hazret-i Şehriyârî'ye hutûr ve bunların me'mûriyyetleri insırâfıyla müstakıllen Mi‘mâr Ağa ve Güler Bey-zâde ta'yîn olunmaları bâbında hatt-ı hümâyûn sudûr edüp, fi'l-hâl mâ-lezimeleri ru'yet olunup, savb-ı maksûda ‘azîmet eylediler.