Çünki tertîb-i teʾennîden ibâret olan askerin Ebuhûr'a vusûlü bahra mevkūf ve bu garazın husûlü dahi imdâd-ı rüzgâra muhtâc olduğu maʿrûf olup, rüzgârın ʿadem-i müsâʿadesi ve askerin vaktiyle gelüp erişmamesi ve donanmanın imdâdı lâ-şey kabîlinden olup, mahsûrların kıllet-i mâ ve nefâd-ı zahîre sebebi ile kemâl-i iztırâbları dahi teʿayyün eyledi. Fîmâ-baʿd mahsûriyyet ü mücâdele telef-i nefse bâdî olacağın mülâhaza ile kalʿayı Fransızlar'a teslîm eyledikleri haberi, Der-i devlet-medâr'a vâsıl ve dumûʿ-ı hüzn ü elem aʿyün-i Mü'minîn'den seyl gibi sâyil olup, Dergâh-ı cenâb-ı Müntakım'dan istidʿây-ı nusrat ve ahz-i sâr zımnında ilticây-ı istiʿdâd u kuvvet olundu. [Ü1 244a]