Bundan [Ü3 37b] akdem sebeb-i maʿlûm ile Şâm ve Mısır Serʿaskerliği'nden maʿzûl ve refʿ-i Vezâret'le kevkeb-i ikbâli mütevârî-yi sehâb-ı üfûl olan Vezîr İbrâhîm Paşa, zemân-ı medîdden berü Halebü'ş-şehbâ'da Muhassıl-ı Emvâl ve ahvâl-i ʿArabistân'a vukūfu ber-vech-i kemâl olmakdan nâşî, işbu sefer-i zafer-encâm hengâmında ʿamelden inkıtāʿ ile kûşe-güzîn-i hamûl u ziyâ olması revâ görülmeyüp, Haleb Muhassılı olan mahdûmu ile müşâreket ve o havâlîden müretteb olan levâzımât-ı seferiyyeyi bilâ-kusûr te'diye vü temşiyet ve Mîrü'l-Hâcclık vaktinde vâridât-ı Eyâlet-i Şâm'dan zimmetine geçen mebâliği selefi Vezîr Cezzâr Ahmed Paşa'ya teslîme müsâraʿat eylemek şartıyla Eyâlet-i Haleb, işbu Saferü'l-hayrın yirmi dördüncü günü müşârun ileyhe tevcîh ü ʿinâyet ve selefi Vezîr Şerîf Paşa, Ordu-yi hümâyûn maʿiyyetinde olmağla, bir eyâletle kayırılması muktezây-ı mecârî-yi umûrdan olup, binâʾen-ʿalâ-zâlik Rakka Eyâleti'yle müşârun ileyh tatyîb ve selefi Vezîr Şeyh-zâde İbrâhîm Paşa dahi maskat-ı re'si olan Diyârbekir ile tenşît ü tatrîb ve o tarafdan müretteb asâkir ve zehâyirin bir ân akdem ihrâc ve tahsîli zımnında mansıbına tesrîb olundu. Van Muhâfızı Vezîr Nuʿmân Paşa'dan ehâlî rû-gerdân ve ʿazli bâbında girîbân-ı çâk-ı dâd ü emân olmalarıyla, müşârun ileyhe Kars Muhâfazası ve selefi Ahmed Paşa'ya Van Eyâleti tevcîh ü ihsân olundu.