Haftân Ağası olan Rodosî Ahmed Ağa, hacc ʿavdetinde Vezîr Cezzâr Paşa maʿrifetiyle dâyire-i hestîden dûr ve müsâfir-i kârbân-serây-ı yevm-i nüşûr olmakdan nâşî, Surre Emîni olan Memiş Efendi bu hâdiseden tevehhüm ve havf sirâyet ile vehm ü haşyeti tecessüm edüp, terk-i kâr ü bâr ve baʿzı vesâyit ile Harb Şeyhı tarafına ilticâ vü firâr edüp, her ne kadar hıdmet-i mezkûre sebk-ı mevsim-i hacc ile sâkıt olduysa dahi, mukaddemâ mücâveret kasdıyla ʿâzim ve bu defʿa râciʿ ü kādim olan hâcegân-ı Dîvân-ı hümâyûn'dan Eğinli Mustafa Efendi o tarafda bu hıdmete taʿyîn ve hılâl-i râhda vukūʿ ve temşiyeti lâzım gelen umûr-ı hüccâc bu cihetle tehvîn olunup, birkaç günden sonra Harb Şeyhı delâletiyle Şâm-ı şerîf'de hüccâca vusûl bulup, hıdmet-i lâzimesinde kemâ-kân kıyâm ile Âsitâne-i saʿâdet'e ʿavd u kufûl eyledi.