Esâfil-i nâsdan olup, bundan akdem Zecriyye Emâneti'ne nâyil olan el-Hâc Ahmed Efendi, reʿâyâyı tehammüllerinden ziyâde mutâlebât ile ızrâr ve sevabık-ı sinîn iltizâmâtına ʿadem-i riʿâyetle zamâyim ü izâfât-ı külliyyeye ictisâr eylediğine binâʾen, fukarâ zâr u zebûn ve hâlleri perîşân u dîger-gûn olup, “Kad aʿzera men enzera” fehvâsınca Bâb-ı ʿâlî'den birkaç defa beyân-ı muktezayât-ı bed ü nîk ile şahmetü'l-üzn-i habâseti taʿrîk olunmuşidi. Merkūm “İttekū daʿvete'l-mazlûmi ve in kâne kâfiran” me'âlini idrâkden câhil ve mezâlim ü teʿaddiyâtdan sûrî ve maʿnevî terettüb eyleyecek mücâzât-ı İlâhiyye'den gâfil olduğuna binâ'en, ân-be-ân şiʿâr-ı cevr ü zulmü tecdîd ve telâhuk-ı efkâr ile hadd-i iʿtidâle resîde olmuş mukātaʿayı beyʿ-i men-yezîd eylediği bi'l-iştikâ vâsıl-i semʿ-i Şehriyâr-ı bâhirü't-te'yîd olmağla, hakkında nâr-ı gazab müştaʿil ve der-ʿakab Emânet'den münʿazil olduğundan gayri, Hâceliğ'i refʿ ve hisâbı rü'yet olundukdan sonra, Anapa Kalʿası'na bi-tarîkı'n-nefy defʿ olunup, Zecriyye Mukātaʿası eyâdî-yi eşiddây-ı ümenâdan tahlîs ve fîmâ-baʿd Îrâd-ı Cedîd tarafından zabt olunması emr-i hümâyûn ile tansîs olundu. İşbu tevcîhâtda Kalyonlar Kitâbeti, Ser-halîfe-i Mektûbî-yi hazret-i Sadâret-penâhî olan Recâ'î Efendi'ye tevcîh olunup, Ordu-yi hümâyûn ile ʿazîmeti [Ü3 36b] esnâsında Kitâbet-i merkūmeyi bedel-i maʿlûm ile mezbûra fârig olmuşidi. Nefy ü tagrîbi sebebi ile mansıb-ı mezkûr mahlûl ve Rikâb Beylikçiliği'nden bu defʿa maʿzûl olan Sâhib Efendi'ye tevcîhi maʿkūl görülmekle, işbu Rebîʿulevvel'in yirmi ikinci günü mansıb-ı mezkûr mûmâ ileyhe tevcîh ile [Ü1 243a] hâtır-ı meksûru mecbûr kılındı.