Livâ'-i mezbûr bundan akdem bazı şarta rabt ve Îrâd-ı Cedîd Defterdârı tarafından akviyây-ı mültezimîne ilzâm ile idâre vü zabt olunur idi. Canik eşkıyâsından olup, Battâl Paşa vakʿasında emvâl-i kesîreye mâlik olan Genc Ağa dâr u resenden reh-yâb olmuş niçe erâzili başına cemʿ edüp, Muhassıllık umûrunu ihlâl ve tersâne tertîbâtını ibtâl eylediği [Ü3 35b] mütevâtir ve izâlesi bâbında emr-i ʿâlî sâdır olmuşidi. Menâʿat-i mekân ve füshat-i zemân, merkūma sebeb-i tahlîs-i cân olduğundan gayri, maksad-ı aslîsi olan Muhassıllığ'ı tahsîl ve refte refte müzâhimlerini tenkîl ü tezlîl edüp, o taraflara bilâ-tekellüf tasarruf ve fukarâ vü zuʿafâyı mübtelây-ı cevr ü teʿassüf [Ü1 242a] eylediği hâlde Battâl Paşa'nın bedr-i kadri iltimâʿ eylediğini istimâʿ ve bu mukaddime helâkini müntic olacağını derk ile lagzîde-pây-i havf u irtiyâʿ olmuşidi. Battâl Paşa berü yakaya çıkup, oğlu Tayyâr Bey ve sâyir akrıbâsı Amasya ve Karahisar'da temekkün ü karâr ve Canik ehâlîsini cezb ü meyle ibtidâr ve ehâlî dahi tekallübât-ı rûzgâra nazar ile Genc Ağa'nın bahtı bergeşte ve bunların kevkeb-i ikbâlleri burc-ı saʿâdete peyveste olduğunu istidlâl ve müteʿayyinlerinden “Sâlih Ağa” nâm kimesne Genc Ağa'ya haber irsâl edüp: “Battâl Paşa takımı memlekete tekarrüb etmekle, bunları tard u tebʿîd ehemm ve size iʿânet üzerimize elzem olup, izhâr-ı sadâkatimiz zımnında beş yüz âdem tarafınıza imdâd gönderildi” deyü merkūmu igfâl ve mebʿûslara dahi tarafeyn muhârebeye mübâşeret eylediklerinde, Genc Ağa'yı terk ve öte tarafa iʿânet emrini taʿlîm edüp, Genc Ağa dahi merkūm Sâlih Ağa'nın bu vazʿını pesend ederek, Amasya üzerine sevk-ı semend eyledi. Tayyâr Bey mâddeye vakıf olup, hemân cemʿ-i kalîl ile üzerine hücûm ü gulüvv ve rû-be-rû oldukları gibi Sâlih Ağa'nın askeri Tayyâr Bey tarafına ser-fürû edüp, sâyir asker dahi Tayyâr Bey tarafına seyl gibi cereyân ü meyl edüp, Genc Ağa birkaç âdem ile firâr ve Zile kurbünde Voyvoda yedine giriftâr olup, Çapân-zâde tarafına teslîm ve keyfiyyet Battâl Paşa'ya Çapân-zâde tarafından ifade vü tefhîm [Ü3 36a] olunduğunu Vezîr-i müşârun ileyh tahrîr ve şakī-yi merkūmun hayyen tarafına tesyîr olunmasını niyâz-nâmesinde tastîr etmekle, Çapân-zâde tarafından şakī-yi merkūm istintâk ve emvâl ü eşyâsı hârice ihrâc olundukdan sonra, Battâl Paşa tarafına irsâl ve baʿdehû istîsâl olunmak bâbında müşârun ileyhe ve Çapân-zâde'ye hitâben [Ü1 242b] başka başka evâmir-i celîle ısdâr u tesyâr olundu.