Kutb-ı merkez-i devlet ve Halîfe-i Îzed-i bî-minnet olan Şehriyâr-ı heft-iklîm, salât-ı Cumʿa'yı fâtih-i Mısır olan Sultân Selîm ʿaleyhi rahmetü Rabbenâ'r-Rahîm [Ü3 33a] Câmiʿ-i şerîf'inde edâ ile Hudâvendigâr-ı mebrûrun rûhâniyyetinden istimdâd niyyetini tasmîm buyurmuşlar idi. Zevrak-ı hilâl-revnak-ı Saltanat'larına süvâr ve hulûs-ı taviyyet-i Şâhâne ile ol semte neşr-i envâr buyurdukları hengâmda, Ebuhûr fethine dâ'ir İskenderiyye Serʿaskeri müşârun ileyhin tahrîrâtıyla Tatar Ağası kādim ve işbu beşâretin huzûr-ı müstevcibü's-sürûr-ı Keyânî'lerine îsâli lâzım olduğuna binâ'en, Telhîsî Ağa ber-vech-i istiʿcâl ol savb-ı kerâmet-evbe irsâl olunmuşidi. Mûmâ ileyh Un-kapanı'na karîb mahalde Dârü's-saʿâde Ağası cenâbının sandalına yetişüp, ifâde-i hâl ve iskeleye yanaşıldıkda, Ağa-yı müşârun ileyh bizzât huzûr-ı hümâyûna tebliğ-i makāl eyleyüp, Hudâvendigâr-ı İskender-tavsîf bu peyâm-ı meserret-redîf ile câmiʿ-i şerîfi teşrîf ve salât-ı Cumʿa'dan sonra rûh-ı fâtih-i Mısır'ı fâtiha kırâ'atiyle taltîf buyurup, işbu rûz-i behcet-efrûzda fâtih-i Mısır olan Sultân Selîm Câmiʿ'inde edây-ı Cumʿa ihtiyârı ve der-ʿakab Ebuhûr fethinin zuhûr-ı ahbârı mahzâ kerâmet-i hazret-i Tâc-dârî âsârı olup, bu keyfiyyet inşâ'allâhü Teʿâlâ aktâr-ı Mısrıyye'nin bi-hazâfîrihâ teshîrine fâl ve aʿdây-ı ber-küşte-hâlin izmihlâline berâ'etü'l-istihlâl olacağı cây-ı işkâl değildir. Rodos Mutasarrıfı Hasan Bey ve İngiltere donanmasına Sergerde olan İsmit, mevcûd-ı maʿiyyetleri olan ecnâd u sefâyin ile Serʿasker Paşa'dan birkaç gün sonra Ebuhûr semtine vusûl ile fi'l-cümle kuvvet-i kalb husûlüne sebeb olmuşlar ise dahi, bu hatb-ı ʿazîm ve emr-i cesîmin rü'yeti pey-der-pey asâkir ve zehâyir îsâline vâbeste vü mevkūf olduğunu Serʿasker-i müşârun ileyh ifade edüp, ʿinâyet-i bî-gāyet-i İlâhiyye ile [Ü3 33b] erâzî-yi Mısrıyye mevtây-ı akdâm-ı cünûd-ı Devlet-i ʿaliyye olmuşiken, ve ʿAkkâ vakʿası ve ʿale'l-husûs bu defʿa zuhûr eden Ebuhûr kazıyyesi düşmeni mübtelây-ı dü-şâha-i iztırâb ve giriftâr-ı çâr-mevce-i inkılâb etmişiken, İskenderiyye ordusuna imdâd u iʿânede kusûr, hılâf-ı rızây-ı Rabb-i Gayûr ve fevt-i fursatı müstelzim bir emr-i beyyinü'l-mahzûr olduğu nezd-i Şehriyâr-ı Felâtûn-âsâr'da "Ke'ş-şemsi fi râbiʿati'n-nehâr" celî vü âşikâr olmağla, Serʿasker-i müşârun ileyhe min-külli'l-vücûh kudret ü miknet verilmek husûsu şifâhen erkân-ı devlete emr-i hümâyûn olmağın, fi'l-hâl Dergâh-ı ʿâlî yeniçerilerinden ve Bostâniyân tüfengcilerinden ve Bostancı neferâtından cemʿ-i kesîr tahrîr ve sefâyine vazʿ u tesyîr olunduğundan gayri, Bahr-i sefîd Boğazı'nda ihtişâd eden askerden dahi ol mikdâr neferât intihâb ve bir ân akdem ol cânibe şirâ-güşây-ı seyr ü zehâb olmak emri lâzım gelenlere hitâb olunup, sâbıkā İç-il Mutasarrıfı olup, Kıbrıs muhâfazasında kıyâm eden Mîr-i mîrân Ahmed Paşa'ya bu defʿa İç-il Sancağı ihsân ve maʿiyyetinde olan askerden mâ-ʿadâ kapu halkı ve Kıbrıs Muhassılı'nın bu defʿa tedârük edebildikleri asker ile İskenderiyye cânibine revân olması ve birâderi İç-il'e serʿîan varup, bin nefer cedîd asker tahrîr ve verâsından tesyîr eylemesi fermân olunup, kezâlik Kara ʿOsmân-zâde ve ʿAlâ'iyye Mutasarrıfı ve Teke Mütesellimi dahi ʿale'l-infirâd ihrâc-ı ecnâd ile Serʿasker Paşa'ya imdâd eylemeleri irâde ve taraflarına başka başka evâmir-i celîle firistâde olunup, medâr-ı tekavvî-yi asker olan ecnâs-ı zehâyir dahi mecmaʿ-ı zehâyir olan emâkinden sefâyine vazʿ u teşhîn ve pey-der-pey ol cânibe irsâl olunmak me'mûr olanlara ifâde vü tebyîn ve lede [Ü3 34a] 'l-iktizâ ru'ûs-ı guzât u mücâhidîni tezyîn içün mikdâr-ı vâfî çeleng ve müşârun ileyhin defʿ-i zarûret ü ihtiyâcı içün yüz elli bin guruşluk altûn ve taʿyînât-ı askere medâr olmak üzere Nüzül Emîni'ne bu defʿa dahi elli bin guruşluk altûn irsâl ve ber-vech-i istiʿcâl husûlü mümkin olan tedârükât ü tedbîrât nesak-ı mezkûr üzere bi-fazlillâhi'l-Meliki'l-Müteʿâl ikmâl olundu. Cenâb-ı Melik-i Muʿîn tenezzehe zâtuhû ʿan-akvâli'l-müşrikîn tedâbîr-i erkân-ı Saltanat'ı tevfîkāt-ı ʿaliyyesine karîn ve te'yîd-i dîn ve himâyet-i Seyyidü'l-mürselîn kasdıyla terk-i hâb u nûşîn eden Hâkān-ı İskender-temkîn'i ile'l-ebed taht-ı fîrûzî-baht-ı Hilâfet-i ʿuzmâ'da mekîn ve her hâlde mazhar-ı nasr-ı Mübîn eyleye, âmîn!