Bu defʿa-i müdhişe o havâlîde olan Fransızlar'a münʿakis oldukda, ʿArîş Kasabası'nda müctemaʿ olan askerlerine iblâğ-ı peyâm ve fi'l-hâl tahrîk-i ikdâm-ı habîset-encâm eyleyerek, beş-altı gün zarfında Ebuhûr Kalʿası sahasına vâsıl ve hey'et-i menhûseleriyle Serʿasker Paşa'ya mukābil olup, meydân-ı kâr-zârda aʿdânın nısf derecesi karîn-i zevâl ü demâr ve bakıyyetü's-süyûfunda vehn ve zaʿf-ı küllî bedîdâr olmuşiken, ʿan-asl kıllet üzere olan zümre-i Muvahhidîn'e dahi fütûr u kelâl târî olup, Donanma-yı hümâyûn'dan istiʿâne vü istinsâr olundukda, düşmenin sugr-ı İskenderiyye'de donanması mevcûd iken sefâyinden ihrâc-ı asker müteʿazzir olduğunu ifâde ile iʿânetden tehâşî vü mücânebetleri düşmene bâʿis-i kuvvet-i kalb olup, her tarafdan ceyş-i makhûrunu yürüdüp, hecme-i hasma musâberet fazîletinden ʿârî olan bir fırka sefâyine rükûb fikr-i muhâliyle meyl-i cânib-i sâhil eylediklerini müşârun ileyh müşâhede ve fi'l-hâl esbine süvâr [Ü3 34b] olup, o makūle erbâb-ı cübnü iʿâde irâdesinde iken, müterassıd-ı vakt-i fursat olan hasm-ı nâ-bekâr bu hâlden haberdar olmağla, müşârun ileyh üzerine sevk-ı küffâr ve iki yerinden cerh ile kayd-ı esre giriftâr eyledi. Bu ıztırâb u perîşânî takrîbi ile iki binden ziyâde merd-i neberd-âyîn neyl-i rütbe-i şehâdetle dâhil-i huld-i berîn olup, müşârun ileyhin oğlu ve Hazînedârı iki bin mikdârı gayret-keşân-ı İslâm ile Ebuhûr Kalʿası'na tehassun edüp, imdâd zuhûruna dek aʿdâ ile mukāmevet ü muhârebeye safka-zen-i ittifâk olduklarını bu vâkıʿa-i fâciʿada mevcûd olan Kapu Kethudâsı Çukadarı işbu Rebîʿulevvel'in on dördüncü günü Âsitâne'ye gelüp ifade vü takrîr eyledi. İrtiyâz-ı umûr-ı ceng eden Serʿasker, kalb ve yâhûd verây-ı askerde sâbit-i kadem olup, zarûret-i külliyye mess etmeksizin, merkezinden teharrük ü tenahhî muhâtara-i ʿazîmeyi müstelzim olduğundan fazla, ikdâm ü ihcâm-ı askerîden terettüb eden fesâdı bi'l-vâsıta menʿ u defʿ dâhil-i hayyiz-i imkân iken, teʿayyün-i şahsı ile bizzât cevânib-i askerde pûyân olmak telef-i vücûd mehlekesini îcâb ve niçe hazâyin ile vücûd-pezîr olan hey'et-i ictimâʿiyye-i ecnâdı berhemzede-i inkılâb edegeldiği mücerreb-i uli'l-elbâbdır. "Bu muhârebe takrîbi ile Fransızlar'da zaʿf-ı küllî mahsûs olup, Ebuhûr Kalʿası'nın metâneti dahi müteʿayyin olmağla, dâhil-i hısn olan İslâm'a birkaç bin âdem ile imdâd olunduğu hâlde inşâ'allâh fevz ü zafer mukarrerdir" deyü İngilterelü tarafından tahrîr olunmağla, bâlâda tahrîr olunduğu vech üzere asâkir-i mürettebenin iltihâkına teşmîr-i sâk-ı ihtimâm ve fevc fevc tesyîrlerine mezîd-i ikdâm olundu. Ebuhûr Kalʿası'na tehassun eden askerin ekserîsi [Ü3 35a] Mustafa Paşa'nın etbâʿı olup, bu hadîse sebebi ile Serʿaskerliğilik Anadolu Eyâleti'yle âhara tevcîhi mahsûr olanlara bâʿis-i kesel ü fütûr olur, mülâhazasıyla ibkāsı karâr-gîr-i erbâb-ı re'y ü tedbîr olup, kalʿayı muhâfaza ve askeri iʿmâl ve imdâd varıncaya dek düşmeni iğfâl maslahatına Donanma Başbuğu ʿAbdülfettâh Bey me'mûr ve ol bâbda Kapudan Paşa hazretlerine hitâben hatt-ı hümâyûn şeref-sudûr ve bundan başka hasma dehşet ve sû-be-sû meşgūliyyet îrâs etmek içün el-yevm aʿdâdan hulüvvü mütevâtir olan ʿArîş ve Sâlihiyye taraflarına talîʿatü'l-ceyş makāmında asker tesyîri Sadrıaʿzam ve Serdâr-ı ekrem hazretlerine bâ-hatt-ı hümâyûn ifâde vü beyân olunup, dâhil-i vüsʿ ü imkân olan tedâbîrde hakk budur ki, tehâvün ü noksân vukūʿ bulmayup, hemân cenâb-ı Melik-i Müsteʿân tevfîk-ı ihsân eyleye, âmîn!