Bâʿis-i ihtilâl-i benî âdem ve sebeb-i insilâb-ı râhat-ı ümem olan Françelü'nün katʿ-ı ʿurûk fesâdlarıyla irâhe-i ʿibâd ve ʿale'l-husûs kutr-ı Mısır'dan ihrâclarıyla tathîr-i bilâd, lâzime-i himmet-i kûh-efgen-i Şehriyâr-ı vâlâ-nijâd olduğuna binâ'en, ol kavm-i [Ü3 32a] müstehıkku'l-levm üzerine min-külli'l-cevânib sevk-ı ketâyib ve tertîb-i mevâkib kılınup, İskenderiyye Semti'ne dahi hâlâ Anadolu Vâlîsi Vezîr es-Seyyid Mustafa Paşa Serʿasker nasb u taʿyîn ve mebnây-ı meʾmûriyyeti levâzım-ı gazv ü cihâd ile tarsîn olunmuşidi. Müşârun ileyh mâh-ı Saferü'l-hayrın [on] altıncı İsneyn günü mevcûd-ı maʿiyyeti olan Donanma-yı hümâyûn ve cünûd-ı nusrat-makrûn ile Finike Lîmân'ından refʿ-i lenger ve imdâd-ı nesemât-ı feth u zafer ile İskenderiyye cânibine sefer edüp, İskenderiyye'ye üç buçuk sâʿat buʿd ile taraf-ı yesârında vâkiʿ lisân-ı ʿavâmmda “Ebuhûr” ve lisân-ı havâsda “Rüknü Ebîkīr” denmekle şehîr kalʿa pîşgâhı mahatt-ı lenger-i süfün-i Pâdişâhî olup, der-ʿakab Serʿasker-i müşârun ileyh çigûnegî-yi ahvâl-i aʿdâ zımnında etrâf u eknâfa itâre-i cevâsîs ü ʿuyûn ve tashîh-i istihkâmât u husûn edüp, düşmen-i bed-âyîn Ebuhûr Kalʿası'nı taʿmîr u tahsîn ve muhâfazasına vâfir asker taʿyîn ve etrâfını şerânbo ve hendek ile muhât ve top ve humbara ve sâyir sanâyiʿ-i âteş-bâzîye menât eylediklerinden gayri, hâric-i kalʿada bir tabya îcâd ve mahall-be-mahall toplar vazʿıyla metânetine istinâd üzere oldukları tahkīk olundukda, müşârun ileyh serân-ı sipâh ile ʿakd-i encümen-i meşveret ve mâh-ı mezkûrun on üçüncü İsneyn günü ʿale's-seher ihrâc-ı askere mübâşeret edüp, kalʿaya tahmînen bir sâʿat mesâfe bir mahall-i münâsibe dört kıtʿa top ile bir mikdâr asker hazînedârları ve ʿOsmân Hâce Başbuğluğu'yla ihrâc eyleyüp, askeri muhâfaza ve kalʿayı tazyîk irâdesiyle şalope ve kebîr sandallara toplar vazʿ ve iki kıtʿa momba gemisi tertîb ve bu uslûb-ı mergūb üzere zikr olunan asker kalʿa tarafına sevk u tesrîb olunup, berr ü bahrdan muhârebeye şurûʿ [Ü3 32b] ve aʿdâ dahi tertîb-i efrâd-ı cümûʿ edüp, yedi-sekiz sâʿat nevâyir-i ceng ü sitîz zebâne-keş-i iştiʿâl ve metâʿ-ı girân-behây-ı cân-ı ʿazîz maʿrûz-ı mezâd-gâh-ı dellâl-ı âcâl olup, dûd-ı kebûd-reng top ve tüfengden ecrâm-ı semâviyyede bir cirm-i cedîd, zâhir ü bedîd ve tekâsüf-i gubâr pây-ı guzât ile cevv-i semâda kurs-ı mihr-i münîr nâ-bedîd olup, bu hâl ile dilîrân-ı İslâm tabyaya hücûm u iktihâm ve derûnunda mütehassın aʿdây-ı li'âmı reh-neverd-i vâdî-yi inʿidâm eylediklerinden başka, kalʿaya dahi kemend-endâz-ı duhûl ve derûnunda olan kefere bi'l-cümle ser-bürîde-i seyf-i meslûl olup, sergerdeleri olan laʿîn dahi vâsıl-ı dereke-i siccîn ve nâyil-i füshat-ı âcâl olanlar giriftâr-ı eyâdî-yi Müslimîn olup, tabyaya hücûm hâlinde aʿdânın atdığı lağımdan on nefer merd-i neberd-âyîn, muʿânaka-i hûr-i ʿîn zimnında tâyir-i evc-gâh-ı Bihişt-berîn oldu. Kalʿa ve tabyada mevcûd olan top ve humbara ve mühimmât zabt olundukdan sonra, Serʿasker-i müşârun ileyh rûz-i fîrûz-i feth u zaferin ferdâsı kalʿa sâhasına darb-ı otâd-ı hıyâm ve taʿmîr-i hısn-ı merkūma kıyâm ve ol havâlîde kâ'in ʿaşâyir ü kabâyile neşr-i peygām eyleyüp, kelân-terân-ı kabâyil fevc fevc muhayyem-i Serʿaskerî'ye vüfûd ve îfây-ı merâsim-i hamd ü dürûd eyledikleri ahbârı, Der-i devlet-medâr'a işbu Rebîʿulevvel'in yedinci Cumʿa günü vürûd edüp, ehl-i Tevhîd bu nüvîd-i meserret-berîdden ʿîd ber-bâlây-ı ʿîd edüp, erâzî-yi Mısrıyye kemâ-kân dâhil-i tasarruf-ı Devlet-i ʿaliyye olmak temenniyâtıyla secde-ber-endâz-ı dergâh-ı Hâlık-ı bî-enbâz oldular.