Rütbe-i celîle-i Vezâret ile bundan akdem Bosna Vâlîsi olan Vânî Mehmed Paşa'nın reftârı mücerreb ve etvârı müderreb olmakdan nâşî, te'mîn-i memleket ve defʿ-i mazarrat-ı erbâb-ı gavâyet, müşârun ileyhden me'mûl-i devlet olmağla, işbu Muharremü'l-harâmın yirmi beşinci günü Rumeli Eyâleti tevcîhiyle mahsûd-ı emsâl ve selefi Zihneli Vezîr Hasan Paşa tarafına Bosna'nın tevcîh emr-i şerîfi irsâl olundu.