Müşârun ileyh Vidin seferinden sonra mahall-i hükûmeti olan Travnik'de derd-i cân-hırâş ile bîmâr ve gāyet-i Şevvâl'de vefât eylediği haberi vârid-i Der-i devlet-karâr olup, münhall olan Bosna Eyâleti, Vezîr Gürcü ʻOsmân Paşa'ya tevcîh olunmuşiken, ehâlî-yi Bosna müteveffây-ı müşârun ileyhin Kethudâ'sı olan Vânî Mehmed Ağa'dan hoşnûd u râzî olup, müddet-i ikāmetinde hüsn-i sülûk ü sîret ile bizzât umûr-ı eyâleti idâre ve zulmet-i cevr ü iʿtisâfı re'y-i münîriyle inâre edüp, câme-i zerbeft-i Vezâret dûş-ı hamiyyet-pûşuna lâyık u müstehakk olduğunu beyân ve mûmâ ileyhin bu tarafda vâkıf-ı ahvâli [Ü1 228b] olanlar dahi tavr-ı mergūbunu işâʿa vü îzân ile Rütbe-i Vezâret ihsânını istihsân etmeleriyle, işbu Zilhiccetü'ş-şerîfenin on altıncı günü inzımâm-ı câh-ı vâlâ-yı Vezâret ile Eyâlet-i Bosna tarafına tevcîh ve derece-i ʻizz ü rifʿati bu vechile tenvîh kılındı.