Mütevaffây-ı müşârun ileyh Çelik Mehmed Paşa memâlikinden olup, Paşa'sı vefâtından sonra Enderûn-ı hümâyûn'a çırâğ ve külçe-i sîm-i zâtı pûte-i imtihâna ifrâğ olunmuşidi. Çok geçmeden âbrîz-i mâhiyyeti şâyân-ı sikke-i hüsn-i nazar-ı Şehinşâhî olup, katʿ-ı merâtib ü derecât ile Hazîne Kethudâsı ve baʿdehû Silahdârlık hıdmet-i celîlesiyle binây-ı iʿtibârı metîn-i ü râsî olup, baʿzı ehl-i garaz sevkıyle hıdmet-i mezkûreden tebʿîd ü tecnîb ve Rütbe-i Vezâret'e takrîb ile birkaç mansıba tevellâ vü tasarruf ve ihtiyâr-ı semt-i teʿaffüf ü tekeffüf edüp, Halîl Paşa Sadâreti'nde Âsitâne-i saʿâdet'e daʿvet ve ʻiffetlü Beyhân Sultân izdivâcıyla nâ'il-i kurb-i müsâheret ve baʿdehû Kā'im-makāmlık hıdmetiyle mükerrem ve Ordu-yi hümâyûn ʻavdetinde Selânik Sancağı'yla [Ü3 18b] tahrîk-i tûğ u ʻalem ve baʿdehû Mora ve Eğriboz ve Bosna mansıblarıyla mesrûr ve o esnâda Vidin ordusuna me'mûr olup, baʿde'r-rucûʿ fevti vukūʿ buldu. Müşârun ileyh her ne kadar ʻinâd u ısrâr ile meşhûr ve gabâvet-i tabʿ ile elsine-i nâsda mezkûr ise dahi, hilye-i veraʿ u takvâ ile ârâste ve zînet-i rahm ü şefekat ile bîrâste olup, akrânına nazaran munsif ü muʿtedil ve sâfî-taviyyet ve yek-dil bir Vezîr-i bî-misl idi.