Mîr-i mîrân-ı kirâmdan İskenderiyye Mutasarrıfı İbrâhîm Paşa'nın ʿAkkâ tarafına techîz olunan askerin ihrâcında meşhûd olan saʿy ü gayreti ve sâyir muhavvel-i ʿuhde-i hamiyyeti kılınan umûrun tanzîm ü tesviyesinde kemâl-i himmeti mûcib-i tezâyüd-i rifʿatı olup, kezâlik Tepedelenli ʿAli Paşa hudûdda vâkiʿ birkaç palangayı teshîr ve Korfa tarafına vâfir asker tesyîr edüp, bu sebeble manzûr ve hıdmeti meşkûr ve bir müddetden berü İsmâʿîl cânibi Muhâfızı olan Mehmed Paşa'nın dahi hüsn-i sülûk ü sîreti meşhûr ve Vezâret'e liyâkati mezkûr olmağla, birer mâh fâsıla ile üçüne dahi Rütbe-i ʿazîzü'l-menâl-i Vezâret ihsân ve çerâğ-ı ikbâlleri misbâh-ı münîr-i ʿâtıfet-i hazret-i Şehriyâri'yle fürûzân kılındı.