Çünki sefer-i zafer-eser ittifâk-ı cümle ile mukarrer oldu. Bâdî-yi emrde tevcîh-i menâsıb ve taʿyîn-i merâtib lâzım gelüp, binâ-berîn işbu Zilkaʿdetü'ş-şerîfenin sekizinci günü Dîvân-ı ʿâlî'de Çavuş-başı olan ʿOsmân Efendi, Kethudâlık mesnedine suʿûd ve selefi İbrâhîm Besîm Efendi'nin sadâkat ü istikāmet ve fart-ı zekâ vü reviyyeti meşhûd olduğuna binâ'en, mesâlih-i devletden dûr olması sûʾ-i tedbîrden maʿdûd olup, fe-li-hâzâ Rikâb Kethudâlığı'yla isbât-ı [Ü3 13a] vücûd eyledi. Kezâlik cevdet-i karîha ve fikret-i sahîha erbâbından biri Defterdar nasb olunmak mehâmm-ı lâzimü'l-ihtimâmdan [Ü1 223b] olmağla, hâlâ Îrâd-ı Cedîd Defterdârı Reşîd Mustafa Efendi zikr olunan sıfât ile muttasıf ve umûr-ı seferiyye ile mü'telif olduğundan, câh-ı Defterî'ye irtikā ve selefi İbrâhîm Efendi'nin tahsîl-i emvâlde mümâreseti olduğuna binâ'en, münhall olan Îrâd-ı Cedîd Defterdarlığı ve nezâretler hilʿatini iktisâ eyledi. Rikâb-ı hümâyûn'da dahi mevâcib ve sâyir mürettebât-ı devleti idâreye ve Ordu-yi hümâyûn tarafına pey-der-pey tesyîri lâzım gelan mühimmât ve edevâtı ihzâra sâhib-i iktidâr bir Defterdâr nasbı muktezî olmağla, sâbıkā Sadrıaʿzam Kethudâsı ve hâlâ Defter Emîni olan Mehmed Şerîf Efendi kesret-i istihdâm ile tefâsîl-i ahvâl-i Defterî'ye vakıf ve mezâyâ vü nikât-ı istîfâya ʿârif, Beytülmâl-i Müslimîn'i tetâvül-i eyâdî-yi haveneden vikāye ve muhavvel-i ʿuhde-i hamiyyeti kılınan sâ'ir umûrda sadâkat ü gayreti mâ-lâ-nihâye olduğundan, Rikâb Defterdârlığı'yla kâm-yâb oldu. Kezâlik Riyâset hıdmeti dahi ricâl-i devletden birine tefvîz olunmak lâzım gelüp, hâlâ Re'îsülküttâb olan ʿAtıf Efendi bir müddetden berü düvel elçileriyle mükâlemeye me'mûr olup, mâdde-i ittifâk-ı düvele muvaffak ve Âsitâne'de kalması mecârî-yi maslahata nazaran enseb ü evfak olmağla, Rûznâmçe-i Evvel olan Râsih Mustafa Efendi mükerreren fülk-i maslahata re'îs ve felek-i devlete Bercîs olup, ʿAtıf Efendi, Âsitâne Riyâseti'yle mülâzım-ı Rikâb-ı müstetâb oldu. Âsitâne'de kalmak şartıyla Çavuş-başılık, ʿİzzet Paşa-zâde Saʿîd Bey'e ihsân ve Defter Emâneti ile Feyzî Bey-zâde sâhib-i ʿunvân kılunup, Rûznâmçe-i Evvel mansıbı ile muharrir-i Fakīr nâyil-i etemm-i hubûr ve Anadolu Muhâsebesi'yle [Ü3 13b] el-Hâc Ebûbekir Efendi mesrûr oldu. Mektûbçuluk ve Teşrîfâtcılık ve Beylikçilik ve Kethudâ Kitâbeti [Ü1 224a] ve Âmedcilik hilʿatleri leff ü neşr-i müretteb kāʿidesi üzere Seyyid Sâdık Efendi'ye ve Re'îs Efendi-zâde ʿAbdüşşekûr Efendi'ye ve Sâfî Efendi'ye ve ʿAbdî Beyefendi'ye ve Belîğ Efendi'ye iksâ ve hıdemât-ı mezkûrenin sâbıkda mutasarrıfları olan zevât Rikâb-ı hümâyûn hıdmetinde ibkā olundular.