İmâm-ı Evvel-i Sultânî nusrat-ı asker-i İslâm zımnında deşt-i berdâşte-i bârgâh-ı Sübhânî olup, “Fe'nsurnâ ʿale'l-kavmi'l-kâfirîn” âyetini ihtitâm ʿakabinde nâ-gâh Serâyburnu'ndan bilâ-infisâl toplar atılup, sadâsı mecmaʿ-i ehl-i meşveret olan Hırka-i şerîfe Odası kubbesini tanîn-endâz-ı dehşet ve bu hâlet-i garîbe cümleye îrâs-ı ʿârizâ-i hayret eyleyüp, sebebi su'âl olundukda, meğer Donanma-yı hümâyûn sefâyininden biri li-maslahatin boğazdan rucûʿ edüp, şenlik sûretinde toplar atdığı tahkīk olunmağla, topların vakt-i mezkûreye tesadüfü vesîle-i ittihâz-ı hayriyyet-i fâl ve gāyetü'l-emr asker-i İslâm mansûr ve düşmen-i dîn ü devlet makhûr olacağı istidlâl olundu.