Birkaç seneden berü Boğdan Voyvodası olan Sarı Bey-zâde'nin gabâvet ü belâdeti her ne kadar ʿinde ehli'n-nühâ zâhir u hüveydâ ise dahi, Devlet-i ʿaliyye'ye mukaddem ü muʾahhar istikāmet ile sebk-ı hıdmeti bu âna dek sebeb-i temekkün ü tetâvül müddeti olup, hâlâ Dîvân Tercemânı olan İpsilante'nin oğlu -ki Dâru't-tıbâʿ-ı ʿâmire'de hendeseye müteʿallık üç cildde tabʿ olunan nüshanın mütercimidir- ittifâk-ı düvel maslahatında Tercemân bulunup, hıdmeti mukābili bir nevʿ imtiyâz ile ebnây-ı cinsi beyninde müteşahhas u mümtâz olmasına irâde teʿalluk etmekle, işbu Şevvâl'in yedinci günü Boğdan Voyvodalığı'yla bekâm ve vukūʿ bulan Dîvân'da kuka ve hilʿat telebbüsüyle tertîb-sâz-ı dâ'ire-i ihtişâm oldu.