İşbu bin iki yüz on üç senesi [Ü1 218a] Şevvâl'inin dördüncü günü resm-i dîrîn-i Devlet-i ebed-müddet üzere tevcîhât vukūʿ bulup, hademe-i Bâb-ı ʿâlî ve Şıkkeyn ve Hubûbât Nâzırı'nın pertev-i mihr-i ibkā ile kevâkib-i âmâlleri ziyâdâr u müteleʼâlî olup, mansıb-ı refîʿ-i Tevkīʿ, Mısır Serʿaskeri maʿiyyetinde Defterdâr ve Ordu Nâzırı ünvanıyla mukīm olan Mehmed Efendi'ye tevcîh ve Defter Emâneti Şerîf Mehmed Efendi'ye ibkā ve Büyük Rûznâme ile Râsih Mustafa Efendi ve Baş-muhasebe ile Seyyid Mehmed Efendi kâm-revâ olup, Şehir ve Tersâne ve Darb-hâne emânetleri mutasarrıflarına ibkā ve Matbah Emâneti sâbık Gümrükcü Hasan Ağa'ya ve Arpa Emâneti Mükellef-zâde Mustafa Bey'e ve Anadolu Muhâsebesi muharrir-i Fakīr'e revâ görülüp, Süvârî Mukābeleciliği ile Selîm Sâbit Efendi mihmîz-zen-i tevsen-i rif'at ve Haremeyn Muhâsebeciliği ile Çelebi Mehmed Efendi dil-sîr-i niʿmet-i meserret olup, Yeniçeri Kitâbeti ile Yûsuf Âgâh Efendi dil-şâd ve Sipâh Kitâbeti ile ʿalâ-tarîkı'n-nakl Seyyid Sâdık Efendi isʿâd ve Silahdâr Kitâbeti, Âmedî-i Reʾîsülküttâb olan Mehmed Sa'îd Efendi'ye munzamm ve Mevkūfât ile Emîn Efendi ve Masraf Kitâbeti'yle Mahmûd Bey Kâtibi ʿAli Efendi mükerrem [Ü3 8a] olup, Mâliyye Tezkireciliği, Necîb ʿAbdurrahmân Bey'e; Küçük Rûznâme, ʿAli Bey-zâde Emîn Bey'e tevcîh ü ihsân ve sâyir menâsıb ile mezâriʿ-i erbâb-ı istihkāk reyyân kılınup, baʿzı kesân dahi ʿatıyye-i hazret-i Tâcdârî'yle şâdân “Ve'n-nakdü hayrun mine'n-nisʾeti” kavliyle mütesellî vü handân oldular. Yine yevm-i mezkûrda Yeniçeri Ağası ve rikâb ağaları ibkā olunup, Yûsuf Paşa birâderi Süleymân Bey, Sipâh Ağası ve İsmâʿîl Ağa, Silahdâr Ağası ve Hamdullah Bey, Başbâkī Kulu nasb olunup, vüzerây-ı ʿizâm [Ü1 218b] hazerâtının dahi ekserîsi ibkā vü takrîr ve hâzır u gāyib hidmet-güzârân-ı Dergâh-ı meʿâlî-yi menâkıb, simât-ı kesîrü'l-elvân-ı eltâf-ı Şâhâne'den hisse-mend-i bülga-i menâfiʿ u mekâsib oldu.