Trabzon ehâlîsi öteden berü ru'ûnet u huşûnet ile maʿrûf ve sefk-i dimâ ve gasb-ı emvâl-i zuʿafâ miyânelerinde resm-i me'lûf olduğuna binâ'en, gitdikçe o havâlîde şûriş ü fiten ve âşûb u mihen kesb-i tekavvî vü temekkün eylediği vâsıl-ı derece-i [Ü3 8b] tehakkuk u teyakkun olup, beyne'l-ehâlî hudûs eden ihtilâli defʿ ü izâle nizâm-ı mülk mesâlihinden olup, el-hâletü hâzihî o taraflarda bu maslahatı merâm-ı devlet üzere tesviye vü tanzîm eder ferd-i muʿayyen olmadığı mukaddimesini cenâb-ı Sadru's-sudûr ʿarz-ı huzûr-ı Şehriyâr-ı kâmilü'ş-şuʿûr eylediği hînde, mukaddemâ Anapa cânibi Serʿaskeri iken dâm-ı esre giriftâr ve gâh Rûsiyye memleketinde ve bir zemândan berü Kırım'da karâr ile ʿafv-ı Şehinşâhî'ye intizâr üzere olan Battâl Hüseyin Paşa hânedân-ı kadîmden olup, Trabzon ve Canik [Ü1 219a] taraflarında mütemekkin olan tavâyif-i halkın zabt u rabtına kādir ve müteneffisân-ı memleketin ekseri dâ'ireleri berkeşîdelerinden olmağla, lede'l-iktizâ tarafına iʿânet ile gerden-keşân-ı etrâfı rağbeten ev rehbeten taht-ı itâʿat u inkıyâda idhâl eyleyeceği zihne mütebâdir olup, hakkında cûy-bâr-ı ʿafv-ı Tâc-dârî icrâ ve Vezâret'i ibkāsıyla o havâlî nizâmına taʿyîn buyurulması enseb ü evlâ olduğunu izâfe-i taʿbîrât-ı rikkat-engîz ile zebân-güzâr-ı makāl ve ruhsat-ı Şâhâne'yi istihsâl ʿakabinde Rûsiyye Elçisi ile müzâkere ve baʿdehû mahalline mektûb irsâl etmişler idi. Bu haber-i hayr müşârun ileyhe vâsıl ve derûnunda kemâl-i inbisât ü sürûr hâsıl olduğunu bir kıtʿa ʿarz-ı hâliyle ifâde ve işbu bin iki yüz on üç senesi Şevvâl'i gāyetinde Trabzon Eyâleti'yle Vezâret'i ibkā vü iʿâde ve garâmet-i Mübâşiriyye'den sıyânet kasdıyla menşûr-ı Vezâret ü eyâlet Dergâh-ı ʿâlî kapucu-başılarından birâderi Mehmed Bey ile tarafına firistâde kılındı.