Belde-i mezkûrede meşk-ı şekāvet eyleyerek kesb-i teʿayyün ü şöhret eden ʿAli Dostoğlu ʿAbdurrahmân ve Arnabud Hüseyin'in mukaddemâ zuhûr-yâfte olan etvâr-ı nâ-hemvârları nefy ü iclâlarını îcâb etmişidi. Bir takrîb istihlâs-ı nefs ile Selânik'e dâhil ve îkāz-ı fitneye müştagıl olduklarını, Selânik'de Turnacılık Pâyesi'n ihrâz ile evc-i bagy ü fesâda pervâz ve ʿAlemdârlık şöhretin kesb ile şukka-i livâʾ-i ʿinâdı bâz eden birkaç küştenîler ihsâs ile merkūmâna ittisâl ve iglây-ı dîk-i fesâd içün tedârük-i hass u hâşâk ihtiyâl eylediklerini, hâlâ Selânik Mutasarrıfı Vezîr Ebûbekir Paşa hazretleri sûrî ve maʿnevî karâyin ile istidlâl edüp, defiyle tekayyüd olunmadığı hâlde memleket-i Pâdîşâhî eşkıyâ tasarrufuna girüp, zimâm-ı hall ü ʿakd eyâdî-yi vülât ü hükkâmdan çıkup, tabâyiʿ-i sârika [Ü3 7a] ve nüfûs-ı mâyile olmak hasebiyle bu ihtilâl Mora'ya dek sirâyet ve nizâm-ı hâl hâsıl oluncaya dek vâfir sıklet çekileceği zâhir bir keyfiyyet olmağla, bu reftâr-ı bâgıyâne metrûk ve meslek-i sıdk u savâb meslûk olmak nesâyihi Vezîr-i müşârun ileyh tarafından takdîm ve 'adem-i ittiʿâz [Ü1 217b] 'akabinde mücâzât-ı efʿâl-i şenîʿaları tasmîm olunduğu, bi'l-vâsıta mezbûrlara tefhîm olundukda, sekret-i gaflet perde-dâr-ı çeşm-i basîretleri olup, bu pend-i müşfikāneyi telakkī vü kabûlden ibâ ve izmâr eyledikleri şekāveti icrâ içün sûret-i recâda baʿzı mümteniʿât îrâdına ictirâ eylediklerinden gayri, ısrâr-ı ʿinâd ve iksâr-ı fesâd ile teksîr-i sevâd-ı cemʿiyyet ve husûn-ı şehirden Kelmeriye ve Yedi-kulle kalʿalarını zabt ve irâdelerini kerhen tanzîm içün müşârun ileyhin serâyına top atmak şenâʿatine kanâʿat etmeyüp, dü’ür-i mahallâtı nakb ve refte refte teterrüs ile serâya tekarrübleri tehakkuk olundukda, kahr u tedmîrleri esbâbına teşebbüs olunup, Vezîr-i müşârun ileyh hâricden celb eylediği segbân zümresine dâyiresi halkını ilhâk ve dimây-ı eşkıyâyı ihrâk içün cümlesini rabt-ı hibâle-i ittifâk edüp, defʿaten üzerlerine havâle ve mütehassın oldukları büyûtdan ihrâc ile bir mikdârı kalʿaya kaçup ve bir mikdârı izâle olunduğu hâlde açıkdan kalʿaya mühâcim ve eşkıyâda yârây-ı müdâfaʿa münʿadim olduğundan, kalʿa kapusunu verâdan küşâd ve Selânik'e nazar-ı hasretle nigerân olarak münteşir-i bilâd [Ü3 7b] oldular. Bu maʿrekede dahi vâfir şekāvet-pîşegân telef-kerde-i ʿakab-gîrân olup, ʿavn-i hazret-i Bârî ve yümn-i ikbâl-i cenâb-ı Tâc-dâri'yle belde-i mezkûre levs-i vücûd-ı bugātdan tathîr ve vukūʿu agleb-i ihtimâl olan gā'ile-i ʿazîme ber-taraf-sâz-ı hüsn-i tedbîr-i Vezîr-i Müşterî-tedbîr olup, merkūm Hüseyin, İstanbul'a karîb mahalde giriftâr-ı dâm-gâh-ı gümâştegân-ı devlet ve ser-i maktūʿu galtân-ı meydân-ı mezellet olup, bakıyyetü's-süyûf olan eşkıyâ her ne mahalde ser-nümâ olurlar ise, ahz ü tenkîl olunmalariyçün etrâfa evâmir neşriyle mübâşirler tesbîl olundu.