İngilterelü'nün bir takım donanması bâlâda beyân olunduğu vech üzere Mısır tarafına giden Fransa donanmasına teslît olunduğuna binâʾen, Ebuhûr'da iki donanma telâkī edüp, miyânede [Ü2 228a] eşedd-i kıtâl vukūʿuyla Fransalu'nun birkaç kıtʿa sefînelerin ihrâk ve birkaç kıtʿasını zabt ile kuvvet-i bahriyyeleri muzmahill olduğu haberleri tevârüd eyledikde, mukaddemâ Büyük-dere'ye vazʿ-ı lenger eden [Ü1 213a] Rûsiyye donanması, Devlet-i ʿaliyye donanmasıyla Körfez tarafına gönderilmek bi'l-müzâkere istisvâb ve Françelü'nün Rumeli cânibine itâle-i pây-i tecâvüz etmemesi içün bu reʾy-i rezîn intihâb olunup, meded-kârî-yi nesâyim-i feth ü zafer ile Ak-deniz cânibine bi'l-maʿiyye seyr ü sefer ve ibtidây-ı emrde Çuka Adası'nı ve Zanta ve Kefalonya cezîrelerini teshîr ve Zanta Adası sebâyâsından dört yüz kadar esîr Mora'ya gönderilüp, vâlîsi tarafından Âsitâne'ye tesyîr olunduğu haberi Donanma Başbûğu Kadrî Bey tarafından tebşîr olunduğundan gayri, Yanya Mutasarrıfı Depedelenli ʿAli Paşa dahi mukaddemâ Arnavudluk etrâfını muhâfazaya me'mûr olmuş olmağla, ol hudûda karîb olup, mukaddemâ Venedüklü'den Françelü tasarrufuna dâhil olan Preveze etrâfında müctemaʿ ve hudûd-ı İslâmiyye'ye tehattî fikr-i fâsidinde olan Françe taburuyla muhârebe olunup, ʿavn-i Bârî ve yümn-i ikbâl-i Tâc-dâri'yle aʿdânın ekseri tuʿme-i dehen-i şemşîr ve bakıyyetü's-süyûfları peyveste-i dü-şâha vü zencîr olup, “Preveze” ve “Barga” ve “Venice” ve "Poçindiro" isimleriyle müsemmâ dört kalʿa zamîme-i memâlik-i Pâdişâhî ve zümre-i Müslimîn'e bâʿis-i inşirâh-ı gayr-i mütenâhî oldu. [Ü3 1a]