Elhamdülillâhi Rabbi'l-ʿâlemîn. Ve's-selâtü ve's-selâmü ʿalâ seyyidinâ Muhammed ve ʿalâ âlihî ve sahbihî ecmaʿîn Bâʿis-i tahrîr-i kitâb-ı sıhhat-nisâb oldur ki, Devlet-i ʿaliyye-i dâ'imiyyü'l-karâr ile Sicilyateyn Devleti beyninde derkâr olan vüdd ü tehâb ve hüsn-i vifâkın ânen-fe-ânen takviyet ü istihkâmı tarafeynin matlûbu olduğundan başka, Fransalu'nun lâ-yenkatıʿ nakz-ı ʿahd ile etrâf u eknâfa taʿarruza tesaddîleri hasebiyle memâlik-i Devlet-i ʿaliyye'ye [Ü1 211a] hücûmları derkâr ve Sicilyateyn Devleti'ne dahi sû'-i kasdları zâhir ü âşikâr ve bu vechile beyne'd-devleteyn tevâfuk-ı maslahat bedîdâr olmakdan nâşî şevketlü, mehâbetlü, kudretlü, ʿazametlü Pâdişâh-ı Âl-i ʿOsmân ve Şehinşâh-ı Dârâ-derbân [Ü2 226a] Sultân Selîm Hân-ı Sâlis efendimiz hazretleri ve haşmetlü, menziletlü Sicilyateyn Kıralı Dördüncü Ferdinando cenâbları hıfz-ı memâlik-i cânibeyn ve te'mîn-i reʿâyây-ı tarafeyn ile düşmen-i müşterek olan Fransalu'nun mekāsıd-ı hırs-âlûdunu ibtâl içün bir muʿâhede-i musarraha ʿakd ile işbu muhârebeye müttefikan kıyâma karâr vermeleriyle biz ki, Devlet-i ʿaliyye-i ebediyyü'd-devâm ve Saltanat-ı seniyye-i maʿdelet-irtisâm'ın imzâmızda mastûr merâtib-i celîlesini hâyiz ve bu husûsa murahhasıyız. Kıral-ı müşârun ileyhin Âsitâne-i saʿâdet'de Fevkalʿâde Murahhas Orta Elçisi olan hürmetlü, asâletlü Kostantin Ludolf hutimet ʿavâkıbuhû bi'l-hayr ile ʿakd-i meclis-i mükâleme ve ruhsat-nâmelerimiz birbirimize irâ'e ile müzâkere olunup, zikri âtî şurûtu ʿakd eylemişizdir. Evvelki mâdde: Fransalu'nun Mısır ve İtalya ülkalerine ve Malta Cezîresi'ne hücûm ü istîlâsı, Devlet-i ʿaliyye'nin ve Sicilyateyn Devleti'nin emn ü âsâyişine münâfî bir hâlet idüği celî vü âşikâr olmağla, Pâdişâh-ı Âl-i ʿOsmân hazretleri ve Sicilyateyn Kıralı cenâbları sarâhaten vaʿd ü teʿahhüd ederler ki, Fransa aleyhine derkâr olan işbu muhârebeye müttefikan kıyâm edüp, kendü haklarında olacak kâffe-i mekāsıd-ı hasmâneyi menʿ ve Fransalu'nun tesallutunu devleteyne hem-hudûd bulunan vilâyetlerin üzerinden refʿ içün bi'l-iştirâk iktizâ eden esbâba teşebbüs edeler. İkinci mâdde: Devleteyn-i muʿâhedeteyn bu vechile müttefikan muhârebeye kıyâm etdiklerine binâ'en, vaʿd ü teʿahhüd ederler ki, birbirlerinin [Ü1 211b] mesâlihini iltizâm zımnında ahadühümâ âharı müşterek kılmayınca düşmen-i müşterek ile musâlaha vü mütâreke ʿakd eylemeye. Üçüncü mâdde: Devleteyn-i muʿâhedeteyn [Ü2 226b] vaʿd ederler ki, harekât-ı harbiyyelerine muvâfakat-ı tâmme hâsıl olmak vechi üzere bi'l-müzâkere râbıta vü nizâm vereler. Ve ber-muktezây-ı civâriyyet-i tarafeynin harekâtı îcâb edeceği ve cânibeynin ahvâl-ı hâssası müsâʿid olacağı imdâdları gerek berren ve gerek bahran birbirlerine iʿtâ eyleyeler. Ve Sicilyateyn Kıralı, İtalya semtinde düşmen-i müştereke var kuvvetiyle mukābeleye meşgūl iken Fransalu'nun sademât-ı hücûmuna tâb-âver olamayup, imdâda muhtâc oldukda, Pâdişâh-ı Âl-i ʿOsmân hazretleri lede'l-mutâlebe Kıral-ı müşârun ileyhe Arnavudluk tarafından on bin asker ile iʿânet etmeği ve Sicilyateyn Ülkasi muhâtarada oldukça ve müttefikan düşmen-i müşterek ʿaleyhine olacak harekât îcâb etdikçe, iktizâsına göre Körfez'de ve İç-deniz'de bir kavî donanmayı iʿmâl eylemeği vaʿd eder. Dördüncü mâdde: Ahad-i cânibeynin memâliki düşmen-i müşterekin hücûmuna mazhar olur ise, taraf-ı dîger düşmenin hücumunu defʿ içün vücûhla işgāline kıyâm edeceğinden başka, kendü ahvâli tecvîz edeceği imdâdları, mazhar-ı hücûm olan tarafa iʿtâ eyleye. Vâhid-i tarafeyn kendü memâlikinin âsâyiş ü emniyyeti içün dahi her ne zemân istiʿâne eder ise, taraf-ı âhar kezâlik imdâd ü iʿânet ede. Be-şart-ı ân ki, istiʿâneten daʿvet olunacak berrî ve bahrî asâkiri müsteʿân olan taraf besleye. Ve iʿâneten verilecek kara askerinin imrâriyçün iktizâ eden sefâyin ve zehâyir-i râhiyyeleri kezâlik müsteʿîn olan devlet tarafından idâre oluna. Beşinci mâdde: Devleteyn-i muʿâhedeteyn [Ü1 212a] düşmen-i müşterekin ticâretine mümkin olduğu [Ü2 227a] mertebe îsâl-i hasâr içün iktizâ eden esbâba teşebbüs edüp, Fransalu'nun gerek harbî ve gerek tüccâr sefînelerine lîmânlarını sedd ve Fransa ile her gûne ticâretden reʿâyâlarını menʿ eyleyeler. Ve kendü lîmânlarından Fransa içün zehâyir ve mühimmât-ı harb nakl ü ihrâcını katʿâ tecvîz etmeyeler. Ve bilʿakis tarafeynin donanmaları devleteyne tâbiʿ lîmânlara bilâ-ihtirâz kabûl olunup, muhtâc olabilecekleri zehâyir ve levâzım fey'ât-ı râyice ile iʿtâ oluna. Lâkin sefâyin-i harbiyye-i İslâmiyye'nin başbûğları, Sicilyateyn lîmânlarında cârî olan nezâret kavâʿidine riʿâyet edeler. Altıncı mâdde: Devleteyn-i muʿâhedeteyn maslahat-ı müşterekelerine mebnî ve beynlerinde derkâr olan vüdd ü mahabbete ve hüsn-i civâriyyete riʿâyetlerini nev-be-nev isbâta hâhişkâr olduklarına mübtenî, âsâyîş ü emniyyet-i cânibeyni müstelzim olacak fevâyidi birbirleriyçün istihsâle ve bu husûsu beynlerinde dostâne ve hâlisâne müzâkere birle râbıta vermeğe vaʿd ü teʿahhüd ederler. Yedinci mâdde: Tarafeynin kuvveti bir maksada masrûf olmak ve meşâgıl-ı uhrâ ile meşgûl olmamak elzem-i levâzımdan idüği celî vü âşikâr ve el-hâletü hâzihî Sicilyateyn Kıralı ve kezâlik Fransa ile muhârib bulunan Garb Ocakları arasında derkâr olan muhârebenin imtidâdı, maslahat-ı müşterekeye mugāyir olduğu bedîdâr olmağla, Devlet-i ʿaliyye, Garb Ocakları'nı Sicilyateyn Kıralı'yla bilâ-te'hîr musâlahaya mecbûr etmek ve imtidâdına sâʿî olmak üzere müteʿahhiddir. Sekizinci mâdde: Devleteyn-i muʿâhedeteyn reʿâyâlarının umûr-ı ticârete dahi sarf-ı zihn ve dikkat edeceklerine [Ü2 227b] mebnî, hicret-i Nebeviyye ʿalâ-sâhibihâ efdalü't-tahiyyenin bin yüz elli üç senesi Muharremü' [Ü1 212b] l-harâmının onuncu günü ve târîh-i Nasârâ'nın bin yedi yüz kırk senesi şehr-i Nîsân'ının yedinci günü beyne'd-devleteyn münʿakıd olan ʿahidnâmenin ticârete dâ'ir olan şurûtunu tarafeyne enfaʿ olmak vechi üzere âsâyişin iʿâdesi husûle geldikde, tecdîd etmeği vaʿd ederler. Dokuzuncu mâdde: İşbu ʿahid-nâme Pâdişâh-ı Âl-i ʿOsmân hazretleri ve Sicilyâteyn Kıralı cenâbları tarafından tasdîk olunup, tasdîk-nâmeler altı haftada ve mümkin olursa andan ekall müddetde Âsitâne-i saʿâdet'de mübâdele oluna. Hâtime: Zikr olunan dokuz mâddenin meşrût olduğu vechile vakt-i mezkûrda tasdîk-nâmeleri mübâdelesi hitâm-pezîr olmak içün bizler ki, taraf-ı Devlet-i ʿaliyye-i ebediyyü'd-devâm'dan bâ-ruhsat-nâme-i hümâyûn murahhaslarız. Muktezây-ı meʾmûriyyetimiz üzere işbu temessük terkîm ü imlâ ve kendü mühr ü imzâlarımız ile mahtûm u mümzâ kılınup, Kıral-ı müşârun ileyhin Murahhas Elçisi mûmâ ileyh tarafından kezâlik mahtûm u mümzâ olarak tarafımıza teslîm olunan Frengiyyü'l-ʿibâre ʿaynı bir kıtʿa temessük ile mübâdele ve iʿtâ olundu; hurrira fi'l-yevmi'r-râbiʿi ve'l-ʿaşera min şehri Şaʿbân, sene selâse ʿaşera ve mi'eteyn ve elf min hicreti men lehu'l-ʿizzu ve'ş-şerefu fî beldeti'l-Kostantıniyyeti'l-mahrûse.