Françelü, Malta Cezîresi'ni istihlâs ile kesb-i emniyyet eyledikden sonra, agrâz-ı sâyire icrâsı içün küllî donanma ile Ak-deniz'e çıkdığını Rûsiyyelü istihbâr edüp, bu âfet-i nâgeh- zuhûr şâyed memâlikine sirâyet ile âvâre-i emn ü huzûr olur endîşesiyle ve yâhûd Devlet-i ʿaliyye tarafına imdâd ü iʿâneyi musâfât-ı külliyye celbine medâr edüp, kulûb-ı ehl-i İslâm'da bürʾ ü şifâsı baʿîdü'l-ihtimâl olan dâ'-i ʿudâl kabûl-i zemânet ile bi't-tabʿ tedbîrden ʿâtıl olur mülâhazasına nukāve-i fikr ü hayal edüp, Kara-deniz'de ihzâr u tehyi'e [Ü1 204b] eylediği donanmasını arz-ı hıdmet-i devlet edüp, ittifaka meyl ü rağbetlerini dahi meclis-i mükâlemede Rûsiyye Elçisi îmâ ve baʿdehû İngiltere Elçisi dahi sûret-i ittifakın evleviyyetini inbâ etmişidi. Françelü'nün bağteten iklîm-i Mısır'a hücûmları [Ü2 219a] tehakkuk eyledikde, mukaddemâ Devlet-i ʿaliyye donanmasını ihrâc etmiş bulunup, teksîr ü takviye zımnında Rûsiyye sefâyinin celbine dahi izhâr-ı rağbet ve ittifâk mâddesi meşveret olunup, Françelü'nün ihtirâʿ eyledikleri tavr-ı garîbin muktezâsı, ifnây-ı ʿâlem ve ifsâd-ı merâtib-i benî âdem olup, kulûb-ı kāsiyelerinde rahm ü şefekat ve kavl ü ʿahdlerinde zerretün-mâ sebât ü sadâkat olmadığı hânedân-ı devletlerine etdikleri ihânetden maʿlûm ve müstemirren etrâf u eknâfa hücûm ile seyr ü hareketleri dahi temekkün ü istikrârdan hudûsü meczûm olan fitne vü âşûbdan vâreste olmak garazına mebnî olup, edyândan birine ittibâʿları dahi mechûl olduğundan, ebnây-ı cinsleri ʿadâvetlerin izmâr ve ifnâ vü ihlâklerine hakīkaten hâst-kâr olmalarıyla, bir-iki devlet-i kaviyyü'ş-şekîme ile ittifâk ve yalnız istihlâs-ı Mısır'a harbi hasr etmeyerek, bi'l-külliyye ʿırk-ı fesâd ü şekāvetlerin katʿâ teşmîr-i sâk-ı lâzime-i gayret ü himmet olduğun erkân-ı Devlet-i ʿaliyye zebân-güzâr-ı ifâde vü beyân etmeleriyle, ber-vech-i muharrer Anadolu Pâyesi olup, ʿakl ü dirâyet ile maʿrûf ve idare-i kelâm ve ifâde-i merâm kudretiyle mevsûf Râyif Paşa-zâde ʿİsmet Beyefendi ve Re'îsülküttâb olan ʿAtıf Ahmed Efendi ittifak mâddesine taʿyîn kılınup, birkaç meclisde Rûsiyyelü ve İngilterelü ile ittifaka nizâm ve maslahata hıtâm verildi.