Mısır Serʿaskeri olan Cezzâr Paşa'nın Râgıb Efendi hılâf-gîri olup, maskat-ı re'si olan Şâm'da mütemekkin akrıbâ vü teʿallukātına sadme-i Cezzâriyye'den ihtirâz ile birer mahalle ʿazîmetlerini îmâ etmişidi. Mûmâ ileyhin mektûbu müşârun ileyh yedine vâsıl ve gayz-ı kadîmine terakkī hâsıl olup, mektûbunu Âsitâne'ye firistâde ve müstehakk-ı te'dîb olduğunu ifâde etmekle, fi'l-hâl Amasya'ya tagrîb ve üzerinde olan Topçular Kitâbeti ile Elmâs Paşa hafîdi tatrîb olunup, Ayasofya Şeyhı Mardinî Halîl Efendi dahi Hırka-i şerîfe ziyâretinde hücûm-i ʿateh ü hurâfet ile baʿzı hareket-i nâ-bercâya cesâret edüp, Çekmece'ye tard ü teʿbîd ve birkaç günden sonra mazhar-ı ʿafv-ı Pâdişâh-ı bâhirü't-te'yîd olup, hânesine terdîd olundu.