Baʿzı sikātdan mervîdir ki, Limni Aʿyânı ʿAbdülkerîm Ağa'nın o havâlîde vücûdu lâzım olduğunu Kapudan Paşa hazretleri teferrüs ile vikāyesini iltizâm ve baʿzı şurût ile ʿafvını istirhâm etmişidi. Hançerli-oğlu, ʿAbdülkerîm'e baʿzı mevâdd sebebi ile münfaʿil ü münharıd ve esbâb-ı zevâline muntazır u müterassid olduğu hasebiyle mukaddemce tertîb eylediği hudʿa vü hîlesi mübtal olacağını teyakkun ile [Ü2 211b] reʿâyâyı tekrâr tahrîk ü ifsâd ve: “Eğer bu vartadan mûmâ ileyh tahlîs-ı nefs eyler ise, cümlenizi kahr u berbâd eyleyeceği zâhirdir” deyü tekrâr bess-i şekvâya iğrâ eyleyüp, semere-i ʿakldan bî-behre olan ehl-i raʿiyyet mesfûrun temşiyet-i garazı bâbında tertîb eylediği [Ü1 195b] mukaddime-i fâsideyi mahz-ı nasîhat ʿaddiyle maglatayı dirâz ve müzevvir daʿvâlar ibrâz ile mûmâ ileyhi magsûb-ı Pâdişâh-ı raʿiyyet-nevâz etmelerine mesfûr kavî ʿillet ve katline sebeb ü âlet olup, çok geçmeden mücâzâta mazhar ve seyf-i kahr-ı Pâdişâh-ı ʿasr ile makarrı sakar oldu.