Bir müddetden berü Büyük Tezkireci olan Mehmed ʿArif Efendi me'mûr olduğu hıdmetde kusûru olmayup, kendü dahi erbâb-ı meʿârifden iken etbâʿ belâsıyla lisâna gelüp, hakkında mizâc-ı feyz-imtizâc-ı Mülûkâne mütegayyer olduğundan gayri, Sadrıaʿzam hazretleri, Şeyhülislâm Efendi hazretlerini tatyîb içün dâmâdını Bâb-ı ʿâlî'ye takrîb-i murâd etmekle, işbu gurre-i Şaʿbân'da Küçük Tezkireci olan ʿAvnî Efendi, Büyük Tezkirecilik'e isʿâd ve dâmâd-ı Fetvâ-penâhî Nûrî Halîl Bey Küçük Tezkirecilik ile ber-murâd kılındı.