Memâlik-i mahrûse'ye ceheleden nüvvâb ve hükkâm taʿyîn olunduğuna binâ'en, ahkâm-ı şerʿiyye icrâ olunmayup, fukarâ pâ-zede-i zulm ü iʿtisâf ve zâlim ü mazlûm ve hakk u bâtıl fark olunmayarak, evâmir ü nevâhî-yi İlâhiyye resîde-i derece-i istihfâf olup, fîmâ-baʿd taraf-ı Fetvâ-penâhî'den arpalık ve maʿîşet erbâbına ve Sadreyn tarafından Rumeli ve Anadolu kudâtına nâ-ehl nüvvâb taʿyîn olunmaması tenbîh ü te'kîd olunup, arpalık ashâbı mansıblarının tehammülünden ziyâde şehriyye ve harc-ı bâb ve sâyir şey almamak ve hılâf-ı şerʿ teʿaddîsi zâhir olan Hâkim'in yeri hakk ü te'dîb ve nâ-ehl kimseler tarîk-ı kazâya takrîb olunmayup, [Ü2 209b] kudât ve sâyire evlâd-ı kudât ve ʿulemâya ʿadem-i takdîm ile o makūle hakkında recâ vü şefâʿat kabûl olunmaya. Ve bi'l-fiʿl Şeyhülislâm bulunanlara üçer ve maʿzûllerine ve sudûra ikişer ve İstanbul maʿzûllerine birer mansıbdan mâ-ʿadâ recâ ile mansıb verilmeye. Ve bilâ-imtihân mülâzemet ve mansıb verilmesinden mücânebet olunup, rütbesi mâ-fevkinden mansıba ve hevâya kayd u iʿtibâr olunmamak ve menâsıb-ı kudâta ismi ve pederi ve şöhret ve vilâyeti tahrîr ve sahte kâğıd ile mansıb iddiʿâ edenlere dikkat ve ʿatîk senedlerine: “Fülân mansıb ile bekâm oldu” deyü işâret oluna. Ve Dîvân'da ismini tahrîre muktedir olmayana mansıb verilmeye. Ve Memâlik-i mahrûse'den [Ü1 193b] vârid olan iʿlâmât ü hücec muvâfık-ı kānûn u şerʿ olmadığı takdîrde tatbîk olunmamak ve mevâlî ve kudât bi'n-nefs mansıblarına gidüp, pîr ü ʿalîlleri istisnâ oluna. Ve arpalık ve maʿîşetlere nâyib olanlar huzûr-ı Şeyhülislâmî'de isbât-ı vücûd edüp, mâhiyyeti maʿlûm ola. Ve Anadolu ve Rumeli muhzırlarından maʿlûm ve müteʿârif olanların mâʿadâsı Kapu Kethüdâsı olmamak ve emvâl-i eytâmın muhâfazası, küttâbın ehliyyet ü istikāmetine mevkūf olup, hilye-i istikāmetden ʿârî ketebe istihdâm olunmayup, emvâl-i eytâm dahi vasî yedine verilmamek ve Bezzâzistân'a vazʿ ve muhâfaza olunmak ve eytâmın ebeveyninden müntakıl vakf-ı menâzil ve ʿakār maʿrifet-i şerʿle âhara ferâğ olundukda, “Bedel-i ferâğ” taʿbîriyle deftere kayd ve vasîye teslîm olunduğu hâlde bedel olmak haysiyyeti ile eytâmdan biri fevt olsa veresesi vasîden daʿvâ ve ahza kādir olmayup, bu sûretde [Ü2 210a] fîmâ-baʿd deftere bedel nâmıyla kayd olunmayup, vasîye ikrâz u idâne sûretinde tahrîr olunmak ve bir defʿa katʿ u hasm olunan daʿvâ tekrâr istimâʿ olunmamak husûsâtı, iktizâ edenlere emr-i celîlü'ş-şân ile tenbîh olundu. Ve kâffe-i nezâretlerde vâkiʿ cihât nâ-ehle tevcîh olunmayup, mutasarrıflarından biri fevt oldukda, evlâd-ı zükûru var ise baʿde'l-intikāl kesb-i kudret ve muhtâr-ı cemāʿat oluncaya dek ciheti âhara verilmeyüp vekâletle idâre olunmak ve evlâd-ı zükûru olmayup, ciheti âhara verilmek lâzım gelürse ve yâhûd bir cihet [Ü1 194a] kasr-ı yed murâd olunursa, müteʿallık olduğu taraf, Müfettiş'i imtihân ve Nâzır maʿrifetiyle hasebi ʿarz edüp, ol vechile tevcîh olunmak ve mutasarrıf-ı cihât bilâ-ʿözr-i şerʿî vekâletle cihetlerini idâre eylemeyüp, bi'n-nefs kendüleri edây-ı hıdmet etmeleri bâbında hatt-ı hümâyûn şeref-sudûr olup, ilâ-mâ-şâʾallah düstûru'l-ʿamel olmak üzere taraf taraf evâmir-i ʿaliyye neşr olunup, iktizâ eden mahallere ʿilm ü haberleri verildi.