İstanbul [Ü2 207a] Kadısı olan Nakīb-zâde tekmîl-i müddet ve Medîne'den munfasıl Mehmed Efendi işbu Cumâdelûlâ on beşinde kazâ'-i mezkûr ile kesb-i meserret edüp, Mekke Kadısı olan ʿAbdülkerîm Efendi tekaddüm-i akrândan tersân ve bir pâye ihsân olunması bâbında dâmen-gîr-i erkân-ı Devlet-i ebed-bünyân olmağla, şehr-i mezkûrun on beşinden mûmâ ileyhe pâye verilüp, Mısır'dan maʿzûl ve emedd-i medîdden berü kûşe-güzîn-i hamûl olan Keşşâf ʿÖmer Efendi Cumâdelâhire'nin yirmisinden ve Hırka-i şerîfe Şeyhi es-Seyyid ʿOsmân Efendi yirmi beşinden Mekke-i mükerreme pâyelerine mevsûl ve bu cihetle dahi devâm-ı ʿömr ü devlet-i Pâdişâhî'ye meşgûl oldular.