Hotin Muhâfızı Hüsâmeddîn Paşa, ʿazm-i gülşen-serây-ı bekā ve yerine bir Vezîr taʿyînini zarûriyyât-ı vakt ilcâ etmekle, Segbân-başılık'dan nâyil-i Vezâret ve İznikmid'de ikāmet üzere olan Yeğen Mehmed Paşa, umûr-ı serhadde âşinâ ve Ocağlu ile i’tilâfı hüveydâ olduğuna binâ'en, işbu Cumâdelâhire'nin on sekizinci günü Vezâret'i ibkā ve Hotin muhafazasına isrâ olundu. Mısır Ordusu'nda tehaşşüd eden tavâyif-i askerînin taʿyînâtlarını idâre içün bir Defterdâr nasbı müzâkere olunmuşidi. Hâcegân-ı Dîvân-ı hümâyûn'dan sâbıkā Mevkūfâtî olan ʿAbdülkerîm Efendi dâmâdı Mehmed Efendi müstakīm bir kimse olduğundan, Mısır Ordusu'na Defterdâr nasb olunup, külliyyetlü harc-ı râh ile dâyire-i maʿîşeti tevsîʿ ve tevcîhâtda zabt etmek şartıyla Rûznâmçe-i Evvel mansıbı tevcîhi ile kadri [Ü1 191b] terfîʿ olundu.