İngiltere ve Rûsiyye ittifâkı mâddelerine Re'îsülküttâb Efendi ile bi'l-mürâfaka me'mûr olan ʿİsmet İbrâhîm Beyefendi'nin ʿilm ü fazlı ve rüşdü ʿaklı vâreste-i delîl ü nazar ve iltifât-ı Mülûkâne'ye liyâkati mühr-i münîrden ebyen ü ezher olduğuna binâ'en, işbu Cumâdelâhıre'nin beşinci gününden muʿteber olmak üzere Rumeli Sadâreti Pâyesi müşârun ileyhe ihsân ve kıdem-i tarîk iddiʿâsında olan ʿÂrif Efendi dahi bu ikrâmdan me'yûs olmak revâ-dâşte-i tab-ı Mülûkâne [Ü1 191a] olmayup, şehr-i mezkûrun on beşinci târîhiyle ana dahi pâye-i mezkûr ʿinâyet olunup, o Ferkadân-ı âsumân-ı ʿilm ü ʿirfân mazhar-ı lutf-i Pâdişâh-ı kadr-dân oldular.