Dâru's-saʿâdeti'ş-şerîfe Ağası olan Hâlid Ağa bu esnâda hulûl-i ecel ile ʿâlem-i fânîden katʿ-ı peyvend-i emel [Ü1 188a] eylediği hasebiyle Hazînedâr Ağa olan Bilâl Ağa, Dâru's-saʿâde Ağalığı'yla dil-şâd ve Hazîne Vekîli bulunan Saʿîd Ağa, Hazînedârlık ile isʿâd ve musâhiblerden Kāsım Ağa, Hazîne Vekîlliği ile ber-murâd oldu. Merhûm Hâlid Ağa, Bağdâd Vâlîsi müteveffâ Ahmed Paşa kerîmesi olup, Râbiʿâ-i ʿAdeviyye'ye hem-tâ olan ʿAdile Hanım dâiresinde neşv ü nemâ bulup, sevk-ı kazâ ile Âsitâne'ye resâ oldukda, Râgıb Paşa halîlesi Sâliha Sultân dâiresine verilüp, müşârun ileyhâ vefâtında Serây-ı ʿâmire'ye isticlâb ve giderek Dâru's-saʿâde Ağalığı'yla kâm-yâb ve işbu Rebîʿulevvel'in on yedinci günü semt-i âhirete ʿinân-tâb oldu. Müşârun ileyh muʿtemed ü müstakīm, mütevâzıʿ ü halîm, nâsik ü ʿâbid ve pârsâ-sıfat ve zâhid bir zât-ı mâcid idi.