Her sene Sultân Ahmed Câmiʿi'nde kırâʾat-i nazm-ı Mevlid-i Seyyidü'l-mürselîn de'b-i dîrîn olmakdan nâşî, işbu Rebîʿulevvel'in on ikinci günü vüzerâ ve ʿulemâ ve ekâbir-i ricâl ve Ocağlu hâzır oldukları hâlde Halîfe-i rûy-ı zemîn, Zıllullâhi fi'l-ʿâlemîn câmiʿ-i mezkûru makdem-i şeref-tev’emleriyle hem-reng-i huld-i berîn buyurup, istimâʿ-i ahbâr-ı [Ü2 203b] mevlid-i Ahmed-i muhtâr, ʿaleyhi efdalü salâti'l-ebrâr ile ihyây-ı sünen-i selâtîn-i pîşîn ve baʿdehû Serây-ı hümâyûn'larına imâle-i licâm-ı ʿizz ü temkîn buyurdular.