Topunun fâyizi on kîseden ziyâde olan mîrî ve Haremeyn mukātaʿalarının temâmı ve yâhûd hisseleri inhilâl vukūʿunda Îrâd-ı Cedîd Hazînesi'ne zabt ve on kîseden dûn olanları sekiz senelik muʿaccele ile tâliblerine verilmek nizâm bulmuşidi. Îrâd-ı Cedîd Hazînesi'nden mazbût mîrî mukātaʿalarının [Ü1 183b] bedel-i muʿaccelâtı olarak beş senelik hisâbıyla bir sene mukāyese olunduğuna nazaran senevî Hazîne-i ʿâmire'ye dört yük yetmiş iki bin yüz yirmi üç guruş maktûʿan ve Haremeyn mukātaʿalarının mahlûlâtı tahkīk olunan fâyizine göre yine beş senelik iʿtibârıyla muʿaccelesi Darb-hâne-i ʿâmire'ye müstemirren Îrâd-ı Cedîd Hazînesi'nden teslîm olunmakda olup, lillâhi'l-hamd Îrâd-ı Cedîd Hazînesi mütekessir ve fîmâ-baʿd topunun fâyizi otuz kîseye dek vukūʿ bulan mahlûlât mîrî tarafından satılmak ve otuzdan ziyâde olanlar Îrâd-ı Cedîd Hazînesi'nden zabt olunmak ve muʿaccele bedeli senevî Hâzîne-i ʿâmire'ye mâh-be-mâh verilegelen mebâliğin sülüsânı tenzîl ve sülüs-i âharı sâbıkı gibi mâh-be-mâh verilmek ve topunun fâyizi hadd-i muʿayyenden ziyâde olup, Îrâd-ı Cedîd tarafından zabt olunacak Haremeyn mukātaʿâtının beş senelik muʿaccelesi Darb-hâne'ye teslîm olunmak ve eshâm kasr-ı yedi, zükûr u nisvâna ʿumûmen câyiz olmak ve mahlûl olan eshâm kemâ-kân Îrâd-ı Cedîd [Ü2 199a] Hazînesi'ne zabt olunup, üç senelik muʿaccelesi Hazîne-i ʿâmire'ye ve Haremeyn ise Darb-hâne'ye Îrâd-ı Cedîd Hazînesi'nden teslîm olunmak husûsları karâr-gîr-i nizâm olup, kānûn-nâme-i hümâyûna tezyîl olundu.