İşbu Receb-i şerîf'in on ikinci günü beher sâl sükkân-ı Haremeyn-i şerîfeyn'e irsâli muʿtâd olan Surre-i hümâyûn, Haremeyn Hazînesi'nden ifrâz ve emânetiyle kesb-i imtiyâz eden Tecellî Efendi'ye teslîm olunup, umûrunu tanzîm ʿakabinde müctâz-ı râh-ı Hicâz oldu. Haleb Eyâleti ile Edirne'de ikāmeti fermân olunan Vezîr Mustafa Paşa'nın üzerinde olan İnebahtı Sancağı münhall ve bir müddetden berü Yenişehir'de mukīm olup, o havâlî keyfiyyâtına vukūfu olan Ahmed Paşa'ya ibkāy-ı Vezâret'iyle tevcîhi tasvîb-kerde-i erbâb-ı ʿakd ü hall olduğuna binâ'en, şehr-i mezkûrun [Ü1 180b] yirmi yedinci günü İnebahtı Sancağı müşârun ileyhe sezâ ve mahall görülüp, Magosa'da ikāmet ile hâli berhem-zede-i zîk-ı [Ü2 195b] maʿîşet olan ʿAzm-zâde Nasûh Paşa'nın dahi ibkāy-ı Vezâret'ini Mısır Vâlîsi ve ümerâ recâ etmeleriyle, recâları müsâʿade-i seniyyeye makrûn olup, ibkāy-ı Vezâret'inden başka Hanya Sancağı ile mutayyeb ü memnûn kılındı.