Tersâne-i ʿâmire'de bundan akdem inşâsına mübâderet olunup, bu esnâda tekmîl olunan bir kıtʿa altmış üç zirâʿ sefîne ile bir kıtʿa korvetin deryâya nüzûlü vakti gelüp, işbu Şaʿbân-ı şerîf'in on sekizinci İsneyn günü Pâdişâh-ı yemm-i ʿatâ dâme mâ-dâme'l-felekü'l-aʿlâ hazretleri Tersâne'yi şeref-i kudûmlarıyla pür-behcet ü behâ buyurup, huzûru muʿtâd olan Sadrıaʿzam ve Şeyhulislâm Efendi hazerâtını teveccüh-i Mülûkâne ile nâyil-i mefharet buyurdukdan sonra, ihzâr olunan mahall-i eşrefde zânû-zede-i şevket ve ihtiyâr olunan vakit hulûlünde zikr olunan sefîneler ber-vech-i sühûlet deryâya nüzûl ile izhâr-ı şâd-mânî vü ferhat kılınup, müşârun ileyhimâ hazerâtını birer ferve-i semmûr ilbâsiyle mazhar-ı nevâziş ü iltifât ve sâyirlerini dahi hilaʿ-i fâhire ve ʿatâyây-ı mütekâsire ile hâyiz-i rehîne-i meserrât buyurdukdan sonra, müntezihât-ı Hâkāniyye'lerinden Âyineli-kavak Serâyı'na pâ-nihâde-i şeref ü rağbet ve baʿdehû makarr-ı Saltanat'larına nûr-bahş-ı talʿat oldular. Şehriyâr-ı gerdûn-bestat hazretlerinin levâzım-ı cihâd ü gazâ istikmâline evkāt-ı hümâyûnları masrûf ve yevmen-fe-yevmen ʿudde vü ʿatâd-ı ecnâd semtine zimâm-ı himmet-i Mülûkâne'leri maʿtûf olduğuna binâ'en, yevm-i mezkûrda zikr olunan [Ü1 181a] sefîneye muʿâdil bir sefînenin dahi inşâsına emr ü fermân ve fi'l-hâl [Ü2 196a] lodoslaması refʿiyle inşâsına teşmîr-i dâmân kılındı.